Եվրամիությունն իր մեղքով կորցրեց Ռուսաստանին, այժմ Մոսկվան ԵՄ-ին համարում է ոչ բարեկամական միավորում։
Այս մասին ՌԴ ԱԳ նախարար Սերգեյ Լավրովը հայտարարել է aif.ru-ին տված հարցազրույցում, որն այսօր հրապարակվել է ռուսական դիվանագիտական գերատեսչության կայքում, փոխանցում է ՏԱՍՍ-ը։
«Եվրամիությունը «կորցրեց» Ռուսաստանին, բայց սրա համար ինքն է մեղավոր։ Ի վերջո, հենց ԵՄ անդամ երկրներն ու հենց միության ղեկավարներն են բացահայտ հայտարարում Ռուսաստանին, ինչպես իրենք են ասում, ռազմավարական պարտություն հասցնելու անհրաժեշտության մասին։ Նրանք զենք-զինամթերքով սնում են Կիևի հանցավոր ռեժիմին, հրահանգիչներ և վարձկաններ են ուղարկում Ուկրաինա։ Այդ պատճառով մենք ԵՄ-ին համարում ենք ոչ բարեկամական միավորում»,- ասել է Լավրովը։
Նա ընդգծել է, որ ռուսական կողմն այս իրավիճակից անհրաժեշտ հետեւություններ է արել։ ՌԴ գլխավոր դիվանագետի խոսքով՝ ի պատասխան թշնամական քայլերի՝ Մոսկվան կգործի «կոշտ, անհրաժեշտության դեպքում՝ առաջնորդվելով Ռուսաստանի ազգային շահերով և դիվանագիտական պրակտիկայում ընդհանուր առմամբ ընդունված փոխադարձության սկզբունքով»։
Լավրովը նշել է, որ Ռուսաստանը Եվրամիության հետ երկխոսության ապագայի վերաբերյալ որոշումներ կկայացնի՝ ելնելով երկրի արտաքին քաղաքականության նոր հայեցակարգում ամրագրված շահերից։
«Եթե եվրոպացիները ինչ-որ պահի հրաժարվեն իրենց հակառուսական կուրսից և նախընտրեն Ռուսաստանի հետ փոխադարձ հարգալից երկխոսությունը, մենք կդիտարկենք նրանց առաջարկները և որոշումներ կկայացնենք՝ ելնելով մեր ազգային շահերից, ինչպես դրանք հաստատվել են Ռուսաստանի նախագահ Վլադիմիր Պուտինի կողմից՝ ՌԴ արտաքին քաղաքականության հայեցակարգով», - ասել է ռուսական դիվանագիտության ղեկավարը։
Նա հավելել է, որ իր արտասահմանյան ուղեւորությունների աշխարհագրությունը փոխվել է, և այժմ այն արտացոլում է «ռուսական առաջնահերթությունները միջազգային ասպարեզում», որոնք ամրագրված են արտաքին քաղաքականության նոր հայեցակարգում։
Ամբողջական հոդվածը կարող եք կարդալ այս հասցեով՝ : https://hraparak.am/post/0437059182ae9b9564a67c6e44b886b4
© 2008 - 2021 «Հրապարակ օրաթերթ»
