Եվրոպայում անվտանգության և համագործակցության կազմակերպությունը (ԵԱՀԿ) սկսել է Մինսկի խմբի և դրան առնչվող հաստատությունների լուծարման գործընթացը, ադրբեջանական Report գործակալությանը հայտնել է ԵԱՀԿ-ում Ֆինլանդիայի նախագահության աշխատանքային խմբի խոսնակ և տեղակալ Թոնի Սանդելը։
«Կազմակերպության քարտուղարությունն արդեն սկսել է գործնական քայլեր՝ ԵԱՀԿ մշտական խորհրդի սեպտեմբերի 1-ի որոշումը կատարելու համար, որն ի պատասխան ընդունվել է Ադրբեջանի և Հայաստանի կոչին։ Քարտուղարությունը քայլեր է ձեռնարկում Մինսկի գործընթացն ավարտելու և դրան առնչվող կառույցները լուծարելու համար։ Դա վերաբերում է անձնակազմի հարցերին, արխիվային նյութերին և վարչարարությանը։ Մինչև գործընթացի վերջնական ավարտը, որը պետք է արվի ոչ ուշ, քան այս տարվա դեկտեմբերի 1-ը, կիրականացվեն միայն տեխնիկական գործառույթներ, մասնավորապես՝ գույքի և սարքավորումների փոխանցում»,- նշել է Սանդելը։
Ըստ նրա՝ աշխատանքը վերաբերում է մի քանի ոլորտների, մասնավորապես՝ ԵԱՀԿ գործող նախագահի անձնական ներկայացուցչի աշխատակազմին, բարձր մակարդակի պլանավորման խմբին, ինչպես նաև փաստաթղթերի և արխիվների կառավարմանը։
