Չինաստանն ու ԱՄՆ-ն չեն բանակցում չինական ապրանքների վրա ամերիկյան կողմի սահմանած մաքսատուրքերի շուրջ։ Այս մասին ճեպազրույցի ժամանակ հայտարարել է Չինաստանի ԱԳՆ պաշտոնական ներկայացուցիչ Գո Ցզյակունը։
«Չինական և ամերիկյան կողմերը մաքսատուրքերի հետ կապված հարցերի շուրջ խորհրդակցություններ կամ բանակցություններ չեն վարում: Միացյալ Նահանգները չպետք է մոլորեցնի հանրությանը», – ասել է Չինաստանի ԱԳՆ ներկայացուցիչը:
Ավելի վաղ ԱՄՆ նախագահ Դոնալդ Թրամփը հայտարարել էր, որ ԱՄՆ-ն ակտիվորեն բանակցում է Չինաստանի հետ երկկողմ առևտրի և մաքսատուրքերի շուրջ՝ հավելելով, որ երկխոսությունը լավ է ընթանում։
Նա ապրիլի 2-ին հայտարարել է 185 երկրների և տարածքների ապրանքների համար մաքսատուրքեր սահմանելու մասին։ Ռուսաստանն այս ցուցակում չկա։ 10% համընդհանուր մաքսատուրքերը ուժի մեջ են մտել ապրիլի 5-ին, անհատական մաքսատուրքերը՝ ապրիլի 9-ին:
