Չինաստանի բնակչությունը շարունակել է նվազել՝ 2024 թվականին նվազելով 1,39 միլիոնով՝ հասնելով 1,40828 միլիարդի։ Այս մասին հայտնում է Չինաստանի Ազգային վիճակագրական բյուրոն (NBS):
Զեկույցի համաձայն՝ 12 ամսվա ընթացքում երկրում ծնվել է 9,54 մլն մարդ, մահացել է 10,93 մլն քաղաքացի։ Ծնելիության և մահացության մակարդակը կազմել է համապատասխանաբար 6,77 և 7,76 պրոմիլ։
Պաշտոնական հաշվարկներով՝ Չինաստանում արական սեռի բնակչությունը գնահատվում է 719,09 մլն մարդ (0,1 տոկոս նվազում), իսկ իգական սեռի բնակչությունը՝ 689,19 մլն մարդ (գրեթե անփոփոխ)։ 16-ից 59 տարեկան մարդիկ կազմում են 60,9% (857,98 մլն մարդ)՝ 0,4 տոկոսային կետով պակաս, քան 2023 թվականին։ 65 տարեկանից բարձր քաղաքացիների թիվը հասել է 220,23 մլն մարդու (աճը՝ 1,6%)։
2024 թվականին Չինաստանի քաղաքային բնակչությունն աճել է 1,1%-ով (մինչև 943,5 միլիոն մարդ): Գյուղական բնակավայրերում այն կազմել է 464,78 մլն մարդ՝ նվազելով 2,5%-ով։
2022 թվականին Չինաստանի բնակչությունը 60 տարվա մեջ առաջին անգամ սկսեց նվազել՝ կրճատվելով 850 հազար մարդով։ 2023 թվականին այդ ցուցանիշը նվազել է ևս 2,08 միլիոն մարդով։
