Մեծ Բրիտանիայի կառավարությունը նախատեսում է միգրանտների համար անգլերեն լեզվի ավելի խիստ պահանջներ մտցնել՝ հասարակության մեջ նրանց ինտեգրումն ապահովելու համար։ Այս մասին նշվել է The Times-ի հրապարակման մեջ։ Հաջորդ շաբաթ կհրապարակվի ներգաղթի հարցերի վերաբերյալ «Սպիտակ գիրքը», որը Մեծ Բրիտանիա աշխատանքային վիզայի համար դիմողներից կպահանջի անգլերենի իմացության ավելի բարձր մակարդակ։ Անգլերենի՝ որպես օտար լեզվի ներկայիս GCSE համարժեք մակարդակը հիմնական է համարվում ինտեգրման համար: Այն պահանջում է, որ միգրանտները հասկանան հիմնական խնդիրները, որոնք «սովորաբար ծագում են աշխատանքում, դպրոցում կամ հանգստի ժամանակ», որպեսզի կարողանան հաղթահարել իրավիճակները ,«որոնք կարող են առաջանալ ճանապարհորդության ժամանակ», եւ «պատրաստել պարզ համահունչ տեքստեր ծանոթ կամ անձնական թեմաներով»: Ակնկալվում է, որ մակարդակը կբարձրացվի մինչեւ B2: Ըստ ներքին գործերի նախարարության՝ այս մակարդակը մարդկանցից պահանջում է արտահայտվել «ազատ եւ ինքնաբուխ, առանց արտահայտությունների ակնհայտ որոնման» եւ անգլերենն օգտագործել «ճկուն եւ արդյունավետ սոցիալական, ակադեմիական եւ մասնագիտական նպատակների համար»: Նրանցից կպահանջվի նաեւ մշակել հստակ, լավ կառուցվածքային, մանրամասն տեքստեր բարդ թեմաներով: «Սպիտակ գիրքը» նպատակ ունի լուծել զուտ միգրացիայի ռեկորդային մակարդակը, որը նախորդ տարի կազմել է 728 000, եւ օգնել աշխատանք գտնել ավելի քան ինը միլիոն տնտեսապես ոչ ակտիվ մարդկանց համար: Ակնկալվում է, որ վարչապետ Քիր Սթարմերը բրեքսիթից հետո Բորիս Ջոնսոնի ներդրած միավորների վրա հիմնված ներգաղթի համակարգը ձախողված կհայտարարի եւ կուրվագծի բարեփոխումները, որոնք ուղղված են զուտ միգրացիայի նվազեցմանը եւ տնտեսական աճը խթանելուն: Այլ փոփոխությունները կխստացնեն թեստավորման կանոնները, որպեսզի բոլոր միգրանտները կարողանան ապացուցել իրենց անգլերենի իմացությունը: Ակնկալվում է, որ ապաստան հայցողները հինգ տարի անց կհամապատասխանեն այս չափանիշներին` մշտական բնակության իրավունք ստանալու համար: Միգրանտներին կասեն. «եթե դուք ուզում եք գալ այստեղ, պետք է ձեր ավանդը ներդնեք եւ ինտեգրվեք»,- ասել է կառավարության աղբյուրը: «Սպիտակ գիրքը» նաեւ կպահանջի միգրանտներից ապացուցել, որ նրանք կիսում են բրիտանական ընդհանուր արժեքները, ինչպիսիք են ժողովրդավարությունը եւ տարբեր կրոնների, հավատալիքների եւ մշակույթների նկատմամբ հանդուրժողականությունը, թեեւ դեռ պարզ չէ, թե դա ինչպես է փորձարկվելու: Այժմ նման հարցերը տրվում են միայն թեստի շրջանակում, որը պարտադիր է այն միգրանտների համար, ովքեր դիմում են Միացյալ Թագավորությունում մշտական բնակություն հաստատելու համար առնվազն հինգ տարվա բնակությունից հետո:
