Բելառուսում, մինչ Ալեքսանդր Լուկաշենկոյի հերթական նախագահական ժամկետով վերընտրվելը, ուժայիններին հանձնարարվել է «զտել» բոլորին, որոնք կարող են բողոքել ընտրություններից առաջ կամ քվեարկության ժամանակ, որը նշանակված է 2025 թվականի փետրվարին: Այս մասին Nasha Niva պարբերականին հայտնել են մի քանի իրազեկ աղբյուրներ:
Նրանց խոսքով, մարզային մակարդակով արդեն կազմվել են «կանխարգելիչ խուզարկությունների և կալանավորման» ենթակա անձանց ցուցակները։ Ընդհանուր առմամբ կազմվել է երկու ցուցակ. Առաջինը ներառում է նրանց, որոնք նախկինում դատապարտվել են վարչական կամ քրեական մեղադրանքներով, իսկ երկրորդը ներառում է այն մարդկանց, ովքեր նախկինում չեն հետապնդվել քաղաքական դրդապատճառներով, բայց ում իշխանությունները համարում են պոտենցիալ անհավատարիմ և քաղաքականապես ակտիվ:
Nasha Niva-ի զրուցակիցների խոսքով՝ առաջին ցուցակից մարդկանց կսկսեն այցելել արդեն աշնանը։ Բայց ամենաուժեղ ռեպրեսիաները նախատեսված են դեկտեմբեր-հունվար ամիսներին՝ ավելի մոտ քվեարկության օրվան։ «Որ ընտրություններից առաջ ոչ ոք ծպտուն չհանի»,- պարզաբանել է պարբերականի աղբյուրներից մեկը։
«Եթե մարդն իր հեռախոսում բաժանորդագրած էջեր չունի, բաժանորդագրեք: Անհրաժեշտության դեպքում դրոշը բերեք և լուսանկարեք բնակարանում»,- ստացված հրահանգները մեջբերել է մեկ այլ զրուցակից։
Նաև ընտրություններից առաջ պետք է լինի «ձեռնարկությունների ստուգումներ»՝ ցուցադրական հեռախոսային ստուգումներ և կալանավորումներ աշխատավայրերում։ Ինչպես հայտնում են Nasha Niva-ի աղբյուրները, արդեն որոշվել է նաև նման հաստատությունների և գործարանների ցանկը։
Անվտանգության ուժերի խնդիրն է ապահովել ընտրությունների անցկացումը «առանց նվազագույն միջադեպերի»՝ թռուցիկներով, ձայների թափանցիկ հաշվարկի պահանջներով կամ Լուկաշենկոյի թեկնածության դեմ հրապարակային ելույթներով, նշել են պարբերականի զրուցակիցները։
