Բաքվում, ի պատասխան Ֆրանսիայի ԱԳՆ հայտարարության, Փարիզին խորհուրդ են տալիս «դադարեցնել միջամտությունը Ադրբեջանի ներքին գործերին»։
Հիշեցնենք, որ հերթական դիվանագիտական սկանդալը տարածվել է լրտեսության մեղադրանքների շուրջ։ Դեկտեմբերի 4-ին Բաքվում ձերբակալվել է Ֆրանսիայի քաղաքացի Մարտին Ռիանը, դրանից շատ չանցած ֆրանսիացի երկու դիվանագետ հայտարարվել է պերսոնա նոն գրատա եւ վտարվել է։
Նախօրեին Ֆրանսիայի ԱԳՆ-ն AFP-ին տեղեկացրել էր, որ «Ֆրանսիայի քաղաքացին անհիմն կերպով ձերբակալվել է Ադրբեջանում, եւ Ֆրանսիան պահանջում է անհապաղ ազատ արձակել նրան»։
Մեկնաբանելով այս հայտարարությունը՝ Ադրբեջանի ԱԳՆ մամուլի քարտուղար Այհան Հաջիզադեն հայտնել է, որ «Եվրոպայի եւ Ֆրանսիայի արտաքին գործերի նախարարությունների պնդումները ֆրանսիացի քաղաքացու անհիմն ձերբակալման մասին խեղաթյուրում են իրականությունը, դա Ադրբեջանի ներքին գործերին եւ օրինական հետաքննության գործընթացին միջամտելու հերթական փորձ է»։
