Այսօր Երևանում թիվ 2 երթուղու տրոլեյբուսի վարորդի վրա հարձակված անձը հայտնաբերվել է։ Տեղեկությունը հայտնել է ՆԳՆ մամուլի խոսնակ Նարեկ Սարգսյանը։
Միջադեպից առաջ տրոլեյբուսի վարորդը լուսային ազդանշան է տվել «Chevrolet»-ի վարորդին, որպեսզի նա մեքենան մի քիչ առաջ շարժի, բայց «Chevrolet»-ի վարորդն այդ քայլը հիվանդագին է ընդունել։
«Դեպքի վերաբերյալ ՀՀ ՆԳՆ ոստիկանությունում ահազանգ է ստացվել: Ձեռնարկվում են միջոցառումներ դեպքի հանգմանքները և մասնակցիների ինքնությունը պարզելու ուղղությամբ»,-հայտնել են ՆԳՆ-ից։
Դեպքի վերաբերյալ «Էլեկտրատրանսպորտ» ընկերության գլխավոր ճարտարագետ Ասքանազ Պետրոսյանը NEWS.am–ի հետ զրույցում հայտնել է, որ տրոլեյբուսի վարորդը լուսային ազդանշանով դիմացի ավտոմեքենայի վարորդին զգուշացրել է, որ մի քիչ առաջ շարժվի, որպեսզի հետևից եկող մեքենային ճանապարհ տա, որպեսզի մեքենան կարողանա վերադասավորվել դեպի աջ գնացող գծի մեջ։
«Դիմացի ավտոմեքենայի վարորդը, հավանաբար, լուսային ազդանշան տալը հիվանդագին է ընդունել և սկսել է վիրավորել տրոլեյբուսի վարորդին, որից հետո արդեն կանգառում, որտեղ տրոլեյբուսը կանգառ է արել, մոտեցել է տրոլեյբուսի վարորդին, և նրանց միջև վեճ է առաջացել։ Տրոյելբուսի ուղևորները, ի պատիվ իրենց, պաշտպանել են տրոլեյբուսի վարորդին և կարողացել են հանդարտեցնել վիճակը։ Միջադեպը շարունակություն չի ունեցել»,–նշել է Պետրոսյանը։
Ինչ վերաբերում է տրոլեյբուսի վարորդի ուղղությամբ թքելուն, Պետրոսյանը նշել է, որ տեսանյութում կինն ասում է, որ թքել է, սակայն ոստիկանները պետք է դեռ պարզեն։
