Դուք փաթեթում չեք գտնի այնպիսի մի կետ, որի արդյունքում ինչ-որ ոստիկանության ծառայողի կոչում կհանեն, կամ որևէ արտոնությունից կզրկենք: Այս մասին Ազգային ժողովում լրագրողների հետ ճեպազրույցում ասաց Արդարադատության նախարարի տեղակալ Արփինե Սարգսյանը՝ անդրադառնալով Ներքին գործերի նախարարության ստեղծմանը և իրականացվող բարեփոխումներին:
«Փաթեթով Արտակարգ իրավիճակների նախարարությունը շուրջ չորս ամիս հետո դադարեցնելու է իր գործունեությունը, այսինքն՝ մենք այստեղ խոսու ենք ամբողջ ապարատի գործունեության դադարեցման մասին, իսկ ֆունկցիաները կտեղափոխվեն Ներքին գործերի նախարարություն»,- ասաց նա:
Ինչ վերաբերում է աշխատողների հարցին, ապա Արդարադատության փոխնախարարը նշեց, որ աշխատողների համար բացառիկ հնարավորություն է ստեղծված այս օրենսդրական փաթեթով: «Մենք նախատեսել ենք դրույթ, որ Արտակարգ իրավիճակների նախարարության աշխատակիցները հատուկ ընթացակարգերով, հարցազրուցային փուլերով անցնելու պայմաններով կարող են նշանակվել ՀՀ ներքին գործերի նախարարության համապատասխան պաշտոնում»,-ասաց նա:
Խոսելով ոստիկանության բարեփոխումների մասին՝ նա ասաց, որ ցանկացած լուծում միտված է լինելու նրան, որ մենք ձևավորենք ոստիկանի իսկապես հարգանքի արժանի կերպար, հանրությանը ծառայող ոստիկանի կերպար:
Ինչ վերաբերում է բռնության դեպքերին, ապա նա ասաց, որ տարբեր դեպքերում, քննության են ենթարկվում, և եթե լինեն այնպիսի դեպքեր, երբ կա ոչ իրավաչափ վարքագիծ ոստիկանության ծառայողի կողմից, դրանք կարժանանան համապատասխան արձագանքի:
