Այսօր առավոտյան ուրոլոգ Գևորգ Գրիգորյանն իր ֆեյսբուքյան էջում գրել էր.«Առավոտից բուժկենտրոնների, մասնավորապես պետական ենթակայության տակ գտնվող բուժկենտրոնների տնօրեննրը ահազանգում են, որ նախարարի մերձավոր շրջապատից ստանում են զանգեր և սպառնալիքներ, որ եթե ֆեյսբուքում ու մամուլում հանդես չգան նախարարին գովերգող հայտարարություններով, ապա կկորցնեն «նախարարի բարյացակամ վերաբերմունքը», ինչ նշանակում է, որ տեղի կունենան «ստուգումներ» և պետական միջոցների վերաբաշխում` ֆինանսավորումը կնվազի»:
«Ասեմ ավելին՝ եթե մտնենք բուժկենտրոնների պաշտոնական էջեր, կտեսնեք, որ երեկվանից հայտնվում են հայտարարություններ: Ինչի՞ց դրդված հենց երեկվանից սկսեցին հայտարարություններ տարածել, զուգադիպությու՞ն էր: Այսօր առավոտից էլ մասնավոր բուժկենտրոնների տնօրենները, որոնք մեծաքանակ պետպատվերներ են ստանում, սկսել են գովերգել նախարարին»,-Politik.am-ի հետ զրույցում մանրամասնում է Գրիգորյանը:
Վերջինս նշում է, որ բուժկենտրոնների ղեկավարները չեն ներկայանում, քանի որ պատժամիջոցները կկիրառվեն: «Իսկ Առողջապահության նախարարության ղեկավարությունը վարչական լծակն անխնա կերպով կիրառում է: Մարդիկ վախենում են, որովհետև ընտանիք պահելու խնդիր ունեն: Խնդիրն այն է, որ եթե մենք հանդուրժում ենք այս ամենը, այն շարունակական բնույթ կկրի: Ինքս իմ օրինակով ցույց եմ տալիս, որ չպետք է վախենալ, և նույնիսկ եթե հիմա իմ հանդեպ հետապնդումներ սկսեն, ես պատրաստ եմ այդ ամենին»:
Անդրադառնալով Առողջապահության նախարար Արսեն Թորոսյանի՝ երեկ ասուլիսից հեռանալուն՝ Գրիգորյանն ասում է.
«Եթե մարդը նախարար է, իր հրավիրած ասուլիսն է, ու եթե նույնիսկ ամենաէմոցիոնալ մարդն է իրեն հարց տալիս, նա իրավունք չունի փախչելու: Դա փախուստ էր, եթե ավելի լուրջ հարց լինի, ավելի լուրջ փախուստ է լինելու: Համակարգը նման չձևավորված լիդերի կարիք չունի»:
Անդրադառնալով մեր հարցին, թե Թորոսյանը նշում է, որ իր դեմ արշավ է սկսվել, և տարատեսակ մանիպուլյացիաներ են կիրառվում, մեր զրուցակիցն ասում է.
«Եթե դիտարկենք, որ ամենը կարող է մանիպուլյացիա լինել, ապա պետք է հիշենք, որ Արսեն Թորոսյանի գործունեության քաղաքական պատասխանատվությունը կրում է Նիկոլ Փաշինյանը, և եթե քաղաքական խնդիրներ են ծագում, ապա հարցը պետք է լուծվի այդ մակարդակով: Ինքս ապաքաղաքական եմ, հանդես եմ գալիս միայն մասնագիտական հարթակից և միայն ոլորտի բարեկեցութայն նպատակով: Խնդիրն այն է, որ եթե ուզում են հարցին քաղաքական ելևէջ տալ, պետք է նաև պատրաստ լինեն քաղաքական պատասխանատվություն կրել»:
