Արցախի Հանրապետության ներկայացուցիչը ելույթ է...

Ֆրանսիայի Սենատում տեղի է ունեցել «Հայաստան՝ մեկ տարի անց…» խորագրով խոշոր համաժողով՝ նվիրված Լեռնային Ղարաբաղի Հանրապետության ճանաչման մասին Սենատի բանաձևի միամյակին։ Այս մասին հայտնում է Սենատի պաշտոնական կայքը։

Համաժողովը տեղի է ունեցել Ֆրանսիայի Սենատի և Ֆրանսիայում Հայաստանի դեսպանության համատեղ նախաձեռնությամբ՝ Սենատի նախագահ Ժերար Լարշեի բարձր հովանու ներքո։ Վերջինիս հրավերով համաժողովին մասնակցել  և համաժողովի բացմանը նախագահ Լարշեի հետ ելույթով հանդես է  եկել Հայաստանի ԱԺ նախագահ Ալեն Սիմոնյանը։

Համաժողովի ընթացքում Սենատի քաղաքական ղեկավարությունից զատ, ելույթներով հանդես են եկել նախորդ տարվա պատերազմի ընթացքում և դրանից հետո Արցախ և Հայաստան այցելած ֆրանսիացի հանրային գործիչներ, որոնց թվում են հանրահայտ ֆրանսիացի գրող Սիլվեն Տեսոնը, մեծ ճանաչում ունեցող փիլիսոփա Միշել Օնֆրեն, «L’Œuvre d'Orient» կաթոլիկ կազմակերպության գլխավոր տնօրեն, ազդեցիկ կաթոլիկ առաջնորդ Պասկալ Գոլնիշը և այլք։

Հատկանշական է, որ Սենատի նախագահի հովանու ներքո տեղի ունեցող այս համաժողովի ընթացքում Սենատի հրավերով ներածական ելույթով հանդես է եկել նաև Ֆրանսիայում Արցախի Հանրապետության ներկայացուցիչ Հովհաննես Գևորգյանը։

Համաժողովը եզրափակվել է Սենատի «Հանրապետականներ» խմբակցության ղեկավար, Արևելքի քրիստոնյաների հարցերով խմբի նախագահ Բրունո Ռըտայոյի և Ֆրանսիայում Հայաստանի դեսպան Հասմիկ Տոլմաջյանի ելույթներով։