Վաշինգտոնն ավելացրել է Վենեսուելայի նախագահ Նիկոլաս Մադուրոյի ձերբակալությանը հանգեցնող տեղեկատվության համար վճարման չափը՝ այն 25 միլիոն դոլարից հասցնելով 50 միլիոն դոլարի: Այս մասին X հարթակում տեսանյութ է տարածել ԱՄՆ գլխավոր դատախազ Փեմ Բոնդին:
«Այսօր Արդարադատության նախարարությունը և Պետքարտուղարությունը հայտարարում են պատմական 50 միլիոն դոլարի պարգև այն տեղեկատվության համար, որը կհանգեցնի Նիկոլաս Մադուրոյի ձերբակալությանը», - նշում է Բոնդին տեսանյութում։
Պաշտոնյան պնդում է, որ Վենեսուելայի նախագահն «օգտագործում է միջազգային ահաբեկչական կազմակերպությունները» մահացու թմրանյութեր ԱՄՆ ներմուծելու համար:
Փեմ Բոնդիի խոսքով՝ Մադուրոն «խոշորագույն թմրավաճառներից մեկն է աշխարհում և սպառնալիք է ներկայացնում Միացյալ Նահանգների ազգային անվտանգության համար»:
Դոնալդ Թրամփի նախագահության առաջին ժամկետի ընթացքում ԱՄՆ-ն Մադուրոյին, ինչպես նաև երկրի մի քանի այլ պաշտոնյաների առաջադրել է մեղադրանքներ թմրաահաբեկչությանը մասնակցության համար և նշանակել 15 միլիոն դոլարի պարգև տեղեկատվության համար, որը կհանգեցնի նրա ձերբակալմանը և (կամ) մեղավոր ճանաչմանը:
ԱՄՆ նախորդ վարչակազմը՝ նախագահ Ջո Բայդենի գլխավորությամբ, չի ճանաչել 2024 թվականին կայացած նախագահական ընտրությունների արդյունքները, որոնցում հաղթել է Մադուրոն, և Վենեսուելայի ընտրված նախագահ է հայտարարել ընտրություններում նրա մրցակցին՝ ընդդիմադիր Էդմունդո Գոնսալեսին։
Բայդենը նաև մինչև 25 միլիոն դոլար ավելացրել էր պարգևի չափն այն տեղեկատվության համար, որը կհանգեցներ Մադուրոյի ձերբակալությանը:
