Բախումների որևէ հնարավորություն բացառում եմ, որովհետև Հայաստանի իրավապահ մարմիններն ունեն բոլոր գործիքակազմն ու հնարավորությունները՝ սադրիչ գործելակերպով աչքի ընկնող անձանց չեզոքացնելու՝ օրենքով սահմանված կարգով: Այս մասին ճեպազրույցում ասաց վարչապետ Նիկոլ Փաշինյանը՝ խոսելով տասը եպիսկոպոսների կողմից նախաձեռնված Կաթողիկոսին հանգստի կոչելու պահանջով հավաքին՝ Մայր Աթոռ Սուրբ Էջմիածնում:
«Հայաստանյայց Առաքելական Սուրբ Եկեղեցին պետք է պաշտպանել Կտրիճ Ներսիսյանից և Մայր Աթոռը զավթած մյուս աղանդավորների խմբից: Ես արդեն իմ դիրքորոշումն ասել եմ, որ Կտրիճ Ներսիսյանն ու իր նեղ շրջապատն աղանդավորներ են, ովքեր զավթել են ու եղծում են Հայաստանյայց Առաքելական Սուրբ Եկեղեցու դավանանքը»,-նշեց նա:
Փաշինյանն ընդգծեց, որ տասը եպիսկոպոսների գործողություններն ինքը չի ուղղորդում, բայց պաշտպանում է և աջակցում:
«Այս պահին հավաքին մասնակցելու անհրաժեշտություն և որոշում չեմ տեսնում: Ուզում եմ ձեր ուշադրությունը հրավիրել մի փաստի վրա. տասը եպիսկոպոսներն Էջմիածնի միաբաններ են, այսինքն՝ Էջմիածնի վանական համալիրն իրենցն է և իրենք էլ Էջմիածնի վանական համալիրինն են, հետևաբար՝ իրենց կողմից հնչեցված հրավերը՝ հավաքվելու Մայր Աթոռում բացարձակապես լեգիտիմ է»,-հավելեց վարչապետը:
