Չիլիի նախագահի ընտրության երկրորդ փուլում հաղթել է ծայրահեղ աջակողմյան քաղաքական գործիչ Խոսե Անտոնիո Կաստը՝ Հանրապետական կուսակցությունից։ Ընտրական հանձնաժողովը կիրակի՝ դեկտեմբերի 14-ին, հայտարարել է, որ ձայների 83%-ի հաշվարկից հետո նրան պաշտպանել է ընտրողների մոտ 59%-ը։
Կաստի գլխավոր մրցակից 51-ամյա Ժանետ Խարան՝ Չիլիի կոմունիստական կուսակցության անդամն ու իշխող ձախ կենտրոնամետ դաշինքի թեկնածուն, ստացել է ձայների մոտ 41%-ը, ընդունել է պարտությունն ու շնորհավորել է մրցակցին։
Կաստն իր քարոզարշավում շեշտը դրել է հանցավորության և անօրինական ներգաղթի դեմ խիստ միջոցառումների վրա։ Առաջին փուլից հետո ելույթ ունենալով՝ Կաստը հայտարարել է. «Մենք կվերականգնենք մեր հայրենիքը»։ Ինը երեխայի հայր և բարեպաշտ կաթոլիկ՝ նա արդեն խոստացել է արտաքսել հարյուր հազարավոր անօրինական ներգաղթյալի, հիմնականում՝ վենեսուելացիների։ Նրա հայրը Վերմախտի լեյտենանտ է եղել և նացիոնալ-սոցիալիստական կուսակցության անդամ, որը 1950 թվականին Գերմանիայի դենացիֆիկացիայի ժամանակ փախել է Չիլի։
Սանտյագոյում ծնված Կաստը սովորել է իրավագիտություն տեղի կաթոլիկ համալսարանում և 30 տարի զբաղվել է քաղաքականությամբ։
Նա կլինի Չիլիի առաջին ծայրահեղ աջ գործիչը, որը կզբաղեցնի նախագահի պաշտոնը 1973-1990 թվականներին Ավգուստո Պինոչետի բռնապետությունից հետո։
