Իրանի ԱԳ նախարարությունը կանչել է Աֆղանստանի դեսպանին այն բանից հետո, երբ «Թալիբան» արմատական շարժման ներկայացուցիչը հրաժարվել է ոտքի կանգնել Թեհրանում Իսլամական միասնության 38-րդ միջազգային համաժողովում Իրանի օրհներգի ժամանակ։ Այս մասին հայտնում է Jamaran գործակալությունը, փոխանցում է ՏԱՍՍ-ը:
Իրանի ԱԳՆ Հարավային Ասիայի երկրորդ վարչության ղեկավարը կանչել է Աֆղանստանի դիվանագիտական առաքելության ղեկավարին և դատապարտել տեղի ունեցածը՝ նշելով, որ «Թալիբանի պատվիրակության ներկայացուցչի արարքը չի համապատասխանում Իսլամական միասնության համաժողովին մասնակցելու բարձր նպատակներին»։
Աֆղանստանի դեսպանատան ղեկավարը բացատրել է, որ իրենց ներկայացուցչի արարքը ոչ մի կերպ չի արտացոլում երկրի դիրքորոշումը և անձնական տեսակետի դրսևորում է։
Կոնֆերանսի Աֆղանստանի մասնակիցը տեսանյութ է հրապարակել՝ ներողություն խնդրելով իր արարքի համար՝ ասելով, որ ոչ մեկին վիրավորելու կամ անարգելու մտադրություն չի ունեցել:
