Զրո բովանդակությամբ մարդիկ մտնում են քաղաքականություն՝ օգտագործելով փողը և դրա հաշվին կարողանում են մանդատներ գողանալ Հայաստանի ժողովրդից, ինչը պետք է կանխվի օրենսդրական մակարդակով։ Այս մասին հունիսի 17-ին Ազգային ժողովի շենքում լրագրողների հետ զրույցում հայտարարել է Հայաստանում կառավարող «Քաղաքացիական պայմանագիր» կուսակցության պատգամավոր Արթուր Հովհաննիսյանը՝ մեկնաբանելով անցած ընտրությունների արդյունքներն ու իրավապահների արձանագրած խախտումները։ Հովհաննիսյանն ընդգծել է, որ Կենտրոնական ընտրական հանձնաժողովն արդեն հաստատել է վերջնական արդյունքները՝ փաստելով իշխող ուժի անվերապահ հաղթանակը, ուստի Սահմանադրական դատարանում քվեարկության արդյունքները բողոքարկելու որևէ օբյեկտիվ հիմք չկա։
Միևնույն ժամանակ, նա ափսոսանք է հայտնել, որ քաղաքացիների մի մասը տեղի է տվել գայթակղությանը և հանցավոր ֆինանսական ազդեցության պատճառով իր ձայնը տվել է ընդդիմախոսներին։ «Ցավում եմ, որ Հայաստանի Հանրապետության քաղաքացիները տեղի են տվել ընտրակաշառքին և դրա, ինչպես նաև այլ հանցավոր ազդեցությունների հետևանքով գնացել են տեղամասեր ու իրենց ձայնը տվել պատերազմի եռագլուխ կուսակցության ներկայացուցիչներին։ Նրանք բոլորը պետք է պատասխան տան օրենքի առաջ, և խոսքը չի կարող վերաբերել միայն այն մարդկանց, ում, ինչպես ասում են, տեղում ձեռքից բռնել են»,- հայտարարել է Հովհաննիսյանը։ Նա նշել է, որ Հակակոռուպցիոն կոմիտեն արդեն իսկ Արդարադատության նախարարությանն է փոխանցել երկրի ողջ տարածքում գործած համակարգված հանցավոր սխեմաների անհերքելի և խոսուն ապացույցները։
Պատգամավորի խոսքով՝ քննությունը պետք է հասնի այդ բուրգի ամենավերին օղակներին։ «Այստեղ գործել է հանցավոր սխեմա, և երբ ասում եմ, որ պետք է հասնենք գլուխներին, ապա իմ և բոլորիս կասկածները, բնականաբար, տանում են դեպի «պատերազմի եռագլուխ կուսակցության» ղեկավարները»,- ընդգծել է Հովհաննիսյանը։ Հովհաննիսյանը նաև մատնանշել է ապօրինի գույքի բռնագանձման գործընթացների զուգահեռ առաջմղման անհրաժեշտությունը՝ որպես ստվերային սխեմաների հիմնական շահառուներ անվանելով Ռոբերտ Քոչարյանին, Գագիկ Ծառուկյանին և Սամվել Կարապետյանին։ Նրա կարծիքով՝ նրանք տասնյակ միլիոնավոր դոլարներ են ծախսել ձայներ գնելու համար, սակայն այդ ծախսերը չեն արդարացել, և այժմ նրանց ազդեցությունը պետք է վերացվի՝ հանուն պետական անվտանգության։
Անդրադառնալով նորընտիր խորհրդարանի պատերի ներսում ընդդիմադիր խմբակցությունների հետ հետագա փոխգործակցության հարցին՝ Արթուր Հովհաննիսյանը նրանց համար խոստացել է աշխատանքային ծայրահեղ խիստ պայմաններ։ «Նրանց շատ դաժան իրականություն է սպասվում քաղաքական առումով։ Մենք պատրաստվում ենք քաղաքականապես ոչնչացնել նրանց նիստերի դահլիճում, և այն, ինչ տեղի էր ունենում նախկին ընդդիմության հետ՝ դեռ ծաղիկներ են լինելու այս նոր եռագլուխների համար»,- նշել է Արթուր Հովհաննիսյանը։ Միևնույն ժամանակ, նա հերքել է նիստերի դահլիճ փողոցային ծեծկռտուքի, բոքսի կամ հայհոյանքների վերադարձի վերաբերյալ լրագրողների ենթադրությունները՝ հստակեցնելով. «Դա չի նշանակում, որ քաշքշուկներ են լինելու։ Դա նշանակում է, որ բովանդակային առումով, քաղաքական դաշտում մենք ոչնչացնելու ենք այդ ուժերին, իսկ խորհրդարանը կշարունակի իր բնականոն աշխատանքը»։
Արթուր Հովհաննիսյանը նաև համոզմունք է հայտնել, որ ընդդիմությունը բացարձակապես որևէ պոտենցիալ չունի փողոցային բողոքի ակցիաներ կազմակերպելու կամ բախումներ հրահրելու համար, քանի որ հանրությունը չունի անարդարությունը պաշտպանելու մոտիվացիա, իսկ ընդդիմախոսների բոլոր ամպագորգոռ նախընտրական կարգախոսները վայրկենապես անհետացել են։ «Ընտրություններից արդեն տասն օր է անցել, և որտե՞ղ են հիմա նրանք, ովքեր գոռում էին 300 հազար ադրբեջանցիների մասին։ Ամեն անգամ, երբ սառնարանն էիր բացում, այնտեղից Նարեկ Կարապետյանն էր դուրս գալիս ու գոռում 300 հազար ադրբեջանցիների մասին, թեյնիկն էիր միացնում՝ այնտեղից Ռոբերտ Քոչարյանն էր դուրս գալիս նույն գոռոցով, զուգարան էիր մտնում, կներեք, այնտեղ էլ էիր հանդիպում կալուգացի օլիգարխին՝ այդ նույն թեմայով։ Որտե՞ղ են այդ մարդիկ հիմա»,- եզրափակել է Արթուր Հովհաննիսյանը՝ հավելելով, որ վստահության քվե ստացած կառավարող ուժը օրենսդրական մակարդակով կլուծի համակարգային ընտրակաշառքի հարցը։
