Վրաստանի ՆԳՆ Իմերեթիի ոստիկանության վարչության աշխատակիցները չորս անձի են ձերբակալել՝ «գողական աշխարհին» անդամակցելու և դրա ներկայացուցչին դիմելու մեղադրանքով, հայտնում է «Գրուզիա Online»-ը։
Գործողությունն իրականացվել է Արևմտյան Վրաստանի շրջանային դատախազության հետ համատեղ՝ դատավորի որոշման հիման վրա։
Քննության տվյալներով՝ ձերբակալվածներն օգտագործել են իրենց քրեական հեղինակությունը՝ քաղաքացիների միջև անձնական և ֆինանսական վեճերը լուծելու համար։ Նրանք առաջնորդվել են այսպես կոչված «գողական ավանդույթներով» և որոշումներ կայացրել հակամարտող կողմերից մեկի օգտին։
Ըստ քննության՝ մեղադրյալները, անձնական շահերից ելնելով, պարբերաբար կազմակերպել են այսպես կոչված «գողական պարզաբանումներ»։ Նրանց կայացրած որոշումները, իրենց իսկ մտադրությամբ, պարտադիր էին վեճերի մասնակիցների համար։
Ներկայացված պահանջները չկատարելու կամ սահմանված ժամկետները խախտելու դեպքում մեղադրյալները քաղաքացիներին սպառնացել են ֆիզիկական հաշվեհարդարով և սպանությամբ։
Խուզարկությունների ընթացքում իրավապահներն առգրավել են մեղադրյալների բջջային հեռախոսները, որոնք, ըստ քննության վարկածի, օգտագործվել են միմյանց հետ հաղորդակցվելու համար։
Քննությունն ընթանում է Վրաստանի քրեական օրենսգրքի 223¹ և 223⁴ հոդվածներով։ Մեղավոր ճանաչվելու դեպքում ձերբակալվածներին սպառնում է մինչև 10 տարվա ազատազրկում։
