Հատուկ ռազմական գործողության գոտում զոհվել է հայկական «ԱրԲատ» գումարտակի հրամանատար Հայկ Գասպարյանը։ Այս մասին հայտնել է Ռուսաստանի հայերի միությունը՝ հղում անելով Գորլովկայի (ԴԺՀ) վարչակազմի ղեկավար Իվան Պրիխոդկոյին։
«Այսօր մարտական առաջադրանք կատարելիս հերոսաբար զոհվել է «ԱրԲատ» հատուկ նշանակության առանձին գումարտակի հրամանատար Հայկը («Աբրեկ»)։ Հավերժ հիշատակ», — գրել է Պրիխոդկոն։
Գասպարյանի մարտական ուղին սկսվել է Արտյոմովսկի (Բախմուտ) գրոհին մասնակցությամբ։ Ծառայության ընթացքում նա պարգևատրվել է տասը պետական և գերատեսչական պարգևներով, որոնց թվում են Արիության շքանշանը և «Արիության համար» մեդալը, որը նրան անձամբ հանձնել է Ռուսաստանի նախագահը։
2024 թվականին Հայկ Գասպարյանը դարձել է Ռուսաստանի հայերի միության կողմից սահմանված «Սոգլասիե» մրցանակի դափնեկիր։ Նա չի ապրել մինչև իր հարսանիքի օրը, որը ծրագրված էր փետրվարի 21-ին։
