Ես բնավ չեմ կասկածում, որ ամբողջ համակարգը ղեկավարում է մեկ մարդ՝ գործող վարչապետ Նիկոլ Փաշինյանը։ Այս մասին Ազգային ժողովում, նոյեմբերի 18-ի ավանդական ճեպազրույցում, ասել է ընդդիմադիր պատգամավոր, Հայաստանի Հանրապետական կուսակցության անդամ Տիգրան Աբրահամյանը։
Նրա խոսքով՝ իշխանությունում գտնվելուց 6-7 տարի հետո հայտարարություններն այն մասին, որ ներկայացված ցուցանիշները չեն համապատասխանում պահանջներին կամ որ համբերության բաժակը լցվել է, համոզիչ չեն հնչում։
Աբրահամյանը նաեւ չի բացառել, որ ժամանակի ընթացքում ուժային կառույցներին պարտադրվել են պահանջներ, որոնք անգամ նրանք ի վիճակի չեն եղել կատարելու։ «Ընդ որում, ինչպես քաղաքական, այնպես էլ իրավական պատասխանատվության տեսակետից։ Դա, ի դեպ, միանգամայն հնարավոր է, որ հանգեցրել է ազատումներին»,- ասել է պատգամավորը։
Այնուամենայնիվ, ընդդիմադիրը այս բոլոր գործընթացները չի համարում մի ինչ-որ «պայթյուն» կառավարող քաղաքական էլիտայի ներսում։
Ավելի վաղ հայտնի էր դարձել, որ ՀՀ Քննչական կոմիտեի նախագահ Արգիշտի Քյարամյանը, Հակակոռուպցիոն կոմիտեի ղեկավար Սասուն Խաչատրյանը, Պետեկամուտների կոմիտեի նախագահ Ռուստամ Բադասյանը եւ Բարձրագույն դատական խորհրդի նախագահ Կարեն Անդրեասյանը հրաժարականներ են տվել։
