Ղազախստանի իշխանությունները նախատեսում են մինչև 2025 թվականի վերջը Ռուսաստանի հետ ատոմակայանի կառուցման վերաբերյալ միջկառավարական համաձայնագիր ստորագրել: Այս մասին լրագրողներին հայտնել է Ղազախստանի ատոմային էներգիայի գործակալության նախագահ Ալմասադամ Սատկալիևը, հաղորդում է ՏԱՍՍ-ը։
«Վերջնական որոշումը կկայացվի միջկառավարական համաձայնագրի ստորագրումից հետո։ Ինչպես գիտեք, տեղի է ունեցել միջգերատեսչական հանձնաժողովի նիստ, որը քննարկել և հաստատել է մրցույթային գործընթացի արդյունքները, այնուհետև էներգետիկ խորհրդում ամրագրվել են միջգերատեսչական հանձնաժողովի եզրակացությունները հաստատելու վերաբերյալ վերջնական որոշումները», - ասել է նա՝ պատասխանելով ԱԷԿ-ի կառուցման վերաբերյալ հարցին։
Սատկալիևի խոսքով՝ կողմերն արդեն սկսել են միջկառավարական համաձայնագրի նախապատրաստումը։ «Մենք այժմ մեզ համար բավականին լարված ժամկետ ենք սահմանել. մենք նախատեսում ենք այս փաստաթուղթը ստորագրել մինչև այս տարվա վերջ», - բացատրել է նա։
Սատկալիևը նշել է, որ ԱԷԿ-ի նախագծի ֆինանսավորման հարցերը կքննարկվեն երկու երկրների պետական մարմինների կողմից։
«Սա կորոշվի երկու պետությունների ֆինանսների նախարարությունների միջև բանակցությունների արդյունքներից հետո, սա կլինի կառավարական վարկ։ Մենք այժմ պատրաստել ենք միջկառավարական համաձայնագրի նախագիծ։ Բոլոր պայմանները կորոշվեն բանակցությունների արդյունքների հիման վրա», - մանրամասնեց նա։
