Վրաստանի խորհրդարանը հինգշաբթի օրը երրորդ և վերջնական ընթերցմամբ ընդունել է երկրի միգրացիոն քաղաքականությունը խստացնող փոփոխությունների փաթեթ, հաղորդում է «Նովոստի-Գրուզիա»-ն։
Օրինագիծը նախաձեռնել է Վրաստանի կառավարությունը, իսկ հեղինակել է Ներքին գործերի նախարարությունը։
Փոփոխությունները նախատեսում են անօրինական միգրանտների արտաքսման պարզեցված ընթացակարգ, երկրում մնալու կանոնները խախտելու համար տուգանքների ավելացում և ապաստանի դիմումների քննարկման ժամկետների կրճատում։
Կանոնակարգի համաձայն՝ քրեական և վարչական օրենսգրքերում ներդրվում է նոր տեսակի պատիժ՝ օտարերկրյա քաղաքացու արտաքսում՝ որոշակի ժամկետով երկիր մուտք գործելու արգելքով։
Կացության թույլտվության կամ վիզայի երկարաձգման վերաբերյալ դատական գործընթացներն այլևս չեն կասեցնի արտաքսման գործընթացը։
Բացի այդ, իշխանությունները ներդնում են ապաստանի դիմումների քննարկման արագացված ընթացակարգ նրանց համար, ովքեր ժամանումից հետո առաջին ամսվա ընթացքում դիմում չեն ներկայացրել։ Դիմումները կքննարկվեն նաև անմիջապես սահմանին՝ առանց դիմորդին երկիր մուտք գործելու թույլտվության, եթե նրա մուտքը սպառնալիք է ներկայացնում ազգային անվտանգության համար։
Երկրի Ներքին գործերի նախարարությունը հայտարարել է, որ բարեփոխումները Վրաստանի օրենսդրությունը համապատասխանեցնում են Եվրախորհրդարանի և Եվրոպայի խորհրդի հրահանգներին։
Գործակալությունն ընդգծում է, որ նոր կանոնները նպատակ ունեն պայքարել անօրինական միգրացիայի դեմ և կանխել չարաշահումները միջազգային պաշտպանության ապահովման ոլորտում։
