« «Սուրմալու» առևտրի կենտրոնում որոնողափրկարարական աշխատանքները ներկա պահին տարվում են ենթադրվող էպիկենտրոնային հատվածում»,-այս մասին, դեպքի վայրում, լրագրողների հետ զրույցում ասաց ԱԻ նախարար Արմեն Փամբուխչյանը։
«Ըստ տեղեկությունների՝ այնտեղ նաև պայթյունի պահին եղել է քաղաքացի։ Մենք ամբողջ ուժով տվյալ հատվածում իրականացնում ենք աշխատանքներ»,- ասաց նա։
Նախարարի խոսքով՝ շենքում է բուն պայթյունի պրոցեսը սկսվել, հիմա այնտեղ են աշխատում փրկարարները։
Փամբուխչյանը նշեց, որ որոնման տարածքը նեղացել է. «Քանի որ ենթադրվում է, որ հենց այդտեղ է պայթյունի էպիկենտրոնը, որից առաջացել է թե հրդեհ, թե հարվածային ալիք, դա իր հերթին բարդություններ է առաջացնում մեզ համար։ Նման հարվածային ալիքից և ջերմաստիճանից, նաև գոլորշիացում է տեղի ունեցել, շանսերը հուսադրող չեն, բայց մենք ամեն ինչ անելու ենք, որպեսզի կարողանանք բացազատել այդ հատվածը, օգտագործել մեր շներին, նաև մեր որոնողափրկարարական խումբը փորձի մուտք գործել տվյալ հատված և իրականացնել աշխատանքներ»։
