Վոլգոգրադի մարզում տարածաշրջանը գրոհած ուկրաինական անօդաչու թռչող սարքերի բեկորներն ընկել են նավթավերամշակման գործարանի տարածք, որտեղ նավթամթերքի արտահոսք է տեղի ունեցել և հրդեհ է բռնկվել, հայտնել է մարզպետ Անդրեյ Բոչարովը։
Նախնական տվյալներով՝ տուժածներ չկան։ Խոսքը Վոլգոգրադի նավթավերամշակման գործարանի մասին է, որը «Լուկօյլ»-ի չորս գործարաններից մեկն է (մյուս երեքը գտնվում են Պերմում, Նիժնի Նովգորոդում և Ուխտայում)։
Վոլգոգրադի օդանավակայանում գիշերը ինքնաթիռների ժամանումն ու մեկնումը ժամանակավորապես սահմանափակվել է։ V1 Telegram ալիքի տվյալներով՝ Սոչիից առնվազն մեկ և Մոսկվայից երկու չվերթ է ուշացել։
Անօդաչու սարքերը երկրորդ գիշերն անընդմեջ հարձակվում են Վոլգոգրադի մարզի վրա։ Նախօրեին անօդաչու թռչող սարքի բեկորներն ընկել են քաղաքի Տրակտորազավոդսկի շրջանի 16-հարկանի բնակելի շենքի տանիքին։ Տեղական տելեգրամյան ալիքները նաև գրել են, որ անօդաչուները «թռել են դեպի նավթավերամշակման գործարան»։
ՌԴ Պաշտպանության նախարարության տվյալներով՝ Վոլգոգրադի մարզի վրա ՀՕՊ միջոցները «որսացել և ոչնչացրել են» ինը անօդաչու սարք։ Ընդհանուր առմամբ, գիշերվա ընթացքում Ուկրաինան Ռուսաստանի տարածաշրջանների (հիմնականում՝ սահմանամերձ) վրա արձակել է 44 անօդաչու թռչող սարք, հայտնել են ռազմական գերատեսչությունից։
Վոլգոգրադի մարզում գտնվող «Լուկօյլ»-ի նավթավերամշակման գործարանը, որը Ռուսաստանի Հարավային դաշնային օկրուգում նավթամթերքի խոշորագույն արտադրողներից մեկն է, դարձել է անօդաչու թռչող սարքերի թիրախ։ Հարձակումներից հետո իշխանությունները պարբերաբար հաղորդում են գործարանի տարածքում «տեղային հրդեհների» մասին։ Հունվարին Reuters-ը գրել է, որ գործարանը հրդեհից հետո դադարեցրել է դիզելային վառելիքի հիդրոմաքրման երկու կայանքներից մեկի աշխատանքը, բայց պարզ չէ, թե ինչն է դարձել հրդեհի պատճառը։ Օպերատիվ ծառայություններից հայտնել են, որ հրդեհը տեղի է ունեցել ներքին պատճառներով, այլ ոչ թե արտաքին ազդեցության հետևանքով։
