ԱՄՆ նախագահ Դոնալդ Թրամփը կասկածներ է հայտնել Իրանի դեմ հնարավոր հարձակման լիակատար հաջողության վերաբերյալ, հաղորդել է Axios-ը՝ հղում կատարելով իր աղբյուրներին։ Նրանց տվյալներով՝ պետության ղեկավարը հարցրել է իր օգնականներին, թե արդյոք Իրանի ամրացված օբյեկտները ամերիկյան հակաբունկերային կործանիչներով ռմբակոծելու ծրագիրն իսկապես արդյունավետ կլինի։ Ինչպես նշել է պորտալը, պետության ղեկավարի այս անվստահությունը պատճառներից մեկն է, որ նա դեռեւս կասկածում է, թե արժե արդյոք հարված հասցնել։ Axios-ի աղբյուրների համաձայն՝ Թրամփը ցանկանում է համոզվել, որ նման հարձակումն իսկապես անհրաժեշտ է, որ այն չի ներքաշի ԱՄՆ-ին Մերձավոր Արեւելքում եւս մեկ երկարատեւ պատերազմի մեջ, եւ որ ամենակարեւորն է՝ այն իրականում կհասնի իր նպատակին՝ Իրանի միջուկային ծրագրի ոչնչացմանը։ «Մենք պատրաստ կլինենք Իրանին հարվածելուն։ Մենք դեռ վստահ չենք, որ դա անհրաժեշտ է»,- ընդգծել է պորտալի աղբյուրը Վաշինգտոնի վարչակազմում։ Նրա խոսքով՝ Սպիտակ տան ղեկավարը «պարզապես վստահ չէ», որ ԱՄՆ միջամտությունն անհրաժեշտ է։ Ինչպես նշել է Axios-ը, Պենտագոնի պաշտոնյաները Թրամփին ասել են, որ վստահ են, որ ամերիկյան հակաբունկերային կործանիչները կկարողանան ոչնչացնել Իրանի Ֆորդոյի միջուկային օբյեկտը: Սակայն, շարունակել է պորտալը, չի կարելի ասել, թե Թրամփը լիովին համոզված է դրանում: Նման ռումբերը երբեք չեն օգտագործվել մարտադաշտում, չնայած մի քանի փորձարկումներ են անցել իրենց մշակման ընթացքում:
