ԱՄՆ նորընտիր նախագահ Դոնալդ Թրամփը հրապարակել է Ջիմի Քարթերի հոգեհանգստի արարողության ժամանակ նախկին նախագահ Բարաք Օբամայի հետ ունեցած զրույցի հումորային սղագրությունը։
Truth Social սոցկայքում հրապարակված տեսանյութի ենթագրերի համաձայն՝ նրանք քննարկել են նախագահական ընտրությունների արդյունքները, փոխնախագահ, նախագահի նախկին թեկնածու Կամալա Հարրիսին, նախկին պետքարտուղար Հիլարի Քլինթոնին։
Ըստ հումորային ենթագրերի՝ Օբաման խոստովանում է, որ «ցնցված է» ընտրություններում Թրամփի հաղթանակով: Նա նշել է, որ ամեն ինչ արել է դեմոկրատների թեկնածու Հարրիսի հաղթանակի համար, բայց վերջինս «սարսափելի էր»: Օբաման նաև հավելել է, որ Բայդենը չէր ցանկանում հեռանալ նախագահական մրցապայքարից։
Թրամփը իր հերթին կատակել է, որ Հիլարի Քլինթոնը դեռ ատում է իրեն (նկատի ունի 2016-ի նախագահական ընտրություններում Քլինթոնի պարտվելը Թրամփին): Օբաման պատասխանել է. «Դու տեսա՞ր, նա (Քլինթոնը) նույնիսկ ինձ չնայեց»:
Սակայն տվյալ զրույցի իրական բովանդակությունը հայտնի չէ:
