ԱՄՆ նախագահ Դոնալդ Թրամփը հայտնել է, որ Միացյալ Նահանգները պետք է իրավունք ունենա TikTok հարթակի կեսի նկատմամբ։
«Կարծում եմ՝ Միացյալ Նահանգները պետք է TikTok-ի կեսի իրավունք ունենա», - երկուշաբթի ասել է նա Սպիտակ տան Օվալաձեւ աշխատասենյակում: Երկրի ղեկավարը ստորագրել է նաեւ հրամանագիր, որը նպատակ ունի հետաձգել հարթակի արգելափակումը երկրում առնվազն 75 օրով։
«Կարծում եմ՝ մենք համատեղ ձեռնարկություն կունենանք TikTok-ի հետ։ Տեսնենք, թե ինչ կլինի։ Սա բազմաթիվ գաղափարներից մեկն է»,- ավելացրել է ամերիկացի առաջնորդը։ «Մենք կունենանք TikTok-ի 50 տոկոսը, եւ TikTok-ին կթույլատրվի շարունակել իր գործունեությունը»,- նշել է նա։
«Գուցե մեզ անհրաժեշտ լինի Չինաստանի հավանությունը [գործարքի համար], ես վստահ չեմ,- ենթադրել է Թրամփը:- Բայց վստահ եմ, որ նրանք հավանություն կտան դրան»: Իսկ եթե ոչ, ապա դա կլինի թշնամական ակտի պես մի բան»։ Նա նաեւ զգուշացրել է, որ Վաշինգտոնը պատրաստ կլինի մաքսատուրքեր սահմանել չինական ապրանքների վրա, եթե Պեկինը դեմ լինի TikTok գործարքին։
2024թ. ԱՄՆ նախկին նախագահ Ջո Բայդենը ստորագրել է օրենք, որը չինական ByteDance կորպորացիայից պահանջում էր մինչեւ 2025թ. հունվարի 19-ը TikTok-ը վաճառել ամերիկյան ընկերությանը՝ արգելքից խուսափելու համար։
