Թրամփը դեռևս զայրացած է Պուտինի վրա և կշարունակի զենք վաճառել Ուկրաինային․ Axios

Ուկրաինայի նախագահ Վլադիմիր Զելենսկին և նրա թիմն այժմ փորձում են առավելագույնս ազդել Թրամփի դիրքորոշման վրա՝ Պուտինի հետ նրա հանդիպումից առաջ։ Ինչպես Axios-ին հայտնել են երկու աղբյուրներ, չորեքշաբթի օրը նախատեսվում է Թրամփի վիրտուալ հանդիպումը Զելենսկու և եվրոպացի առաջնորդների մի խմբի հետ։ Զելենսկին փորձում է նվազագույնի հասցնել ռազմաճակատում Ռուսաստանի վերջին հաջողությունների նշանակությունը և ակտիվորեն բանակցում է Եվրոպայում և նրա սահմաններից դուրս գտնվող քաղաքական գործիչների հետ՝ Ալյասկայում բանակցությունների անբարենպաստ ելքից ապահովագրվելու համար։

Անցյալ ուրբաթ Թրամփը մտադիր էր հայտարարել Ռուսաստանի դեմ կոշտ պատժամիջոցների մասին, սակայն դրա փոխարեն հայտարարեց, որ Պուտինին կհրավիրի Ալյասկա։ Միևնույն ժամանակ, վերջին 48 ժամում ռուսական զորքերը հասել են տարվա ամենաարագ առաջխաղացումներից մեկին. Դոնեցկի մարզում նրանց հաջողվել է ճեղքել Ուկրաինայի ԶՈւ պաշտպանությունը մինչև 15-17 կմ խորությամբ։ Զելենսկին այդ ճեղքումը նեղ և տակտիկական է անվանել՝ ուղղված Ալյասկայի գագաթնաժողովից առաջ տեղեկատվական ֆոն ստեղծելուն։ «Զինվորականները դա կշտկեն», - ասել է նա։

Հարցումները ցույց են տալիս, որ ուկրաինական հասարակությունը, որը նախկինում տրամադրված էր պատերազմել մինչև հաղթանակ, այժմ կողմ է արագ խաղաղության կնքմանը։ Ըստ Gallup-ի տվյալների՝ 69 %-ը ցանկանում է համաձայնագիր «որքան հնարավոր է շուտ», իսկ մինչև հաղթանակ պատերազմի կողմնակից ուկրաինացիների թիվը նվազել է մինչև 24 %։ Համեմատության համար նշենք, որ 2022 թվականին ուկրաինացիների 73 %-ը պնդում էր դիմադրությունը շարունակել, մինչդեռ միայն 2 2%-ն էր կողմ բանակցային ճանապարհին։