«Լուսավոր Հայաստան» կուսակցության ներկայացուցիչները հունիսի 12-ին քաղաքացիների հետ հանդիպումներ են անցկացնում Երևանում: «Լուսավոր Հայաստան» կուսակցության նախընտրական ցուցակը ներկայացնող Անի Սամսոնյանը նշեց, որ «Լուսավոր Հայաստան»-ի համերաշխության, միասնության օրակարգն արդեն հասանելի է դառնում բոլորին:
«Ասում են՝ «Լուսավոր Հայաստան»-ին ձայն չտաք, որովհետևը խորհրդարան անցնելու սահմանված շեմը չի հաղթահարելու: Ասում են ձայն չտաք, որովհետև օգնելու են ներկա իշխանության վերարտադրման հարցում: Այն շրջանակներում, որտեղ դեմ են Ռոբերտ Քոչարյանին, ասում են, որ «Լուսավոր Հայաստան»-ը նպաստելու է նախկին իշխանությունների վերադարձին: Այս երեք սուտը փաստում է այն մասին, որ «Լուսավոր Հայաստան»-ի համերաշխության, միասնության օրակարգն արդեն հասանելի է դառնում բոլորին: Մարդկանց համար սա ընկալելի է, սա ընդունելի է»,-ասաց Անի Սամսոնյանը:
Նրա խոսքով, դրական տրամադրվածություն կա իրենց ուժի նկատմամբ և դա, կարծես, սպառնալիք է լինում այն մյուս ուժերի համար, որոնք միմյանց հայհոյում են, միմյանց վիրավորում են:
«Մենք մրցակից ենք դառնում որոշ ուժերի համար: Եվ պատահական չէ, որ բարձր կախած մեր պաստառները դիտավորյալ վնասում են, մասնավորապես, Էդմոն Մարուքյանի նկարը: Սա ազդակ է այն մասին, որ մեր նկատմամբ կոնկրետ քայլեր են կատարվում: Մեր օրակարգն այլ է: Մեր օրակարգը միասնությունն է, համերաշխությունը: Մենք տեսնում ենք ազգային համաձայնության կառավարությունը, որը չի ենթադրում մեկին միանալ կամ որևէ մեկին աջակցել: Մենք համախմբելու ենք պրոֆեսիոնալ մարդկանց»,-ասաց Անի Սամսոնյանը:
