Զանգվածային անկարգությունների մասնակիցների և ահաբեկչության մեղադրանքով ձերբակալվածների գործերը կքննվեն դատարանների հատուկ բաժանմունքներում։ Ինչպես տեղեկանում է ՏԱՍՍ գործակալությունից, այդ մասին հայտարարել է Թեհրանի նահանգի դատական իշխանության ղեկավար Ալի ալ Ղասի Մեհրը:
«Վերջին անկարգությունների հետևանքով զոհվածների զգալի մասն անմեղ մարդիկ են, և նրանք, ովքեր սպանվել են ահաբեկիչների կողմից։ Վարժեցված ահաբեկիչների բռնության մակարդակը, հանցագործությունների և հարձակումների դաժանությունը վերջին գիշերների անկարգությունների ժամանակ հսկայական էին։ Թեհրանի նահանգի դատական համակարգը լիովին պատրաստ է քննելու ահաբեկիչների և անկարգությունների ու խռովությունների համար ձերբակալվածների գործերը, այդ նպատակով ստեղծվել են հատուկ բաժանմունքներ», - մեջբերել է նրա խոսքն Իրանի պետական հեռուստառադիոընկերությունը։
Ալ Ղասի Մեհրը նաև հայտնել է, որ «Թեհրանի նահանգի շրջաններից մեկում զոհերի մեծ մասը դանակահարության վերքեր է ստացել թիկունքին և կողքին»:
Ըստ իրավապաշտպան խմբերի՝ դեկտեմբերի 28-ից Իրանում շարունակվող հակակառավարական ցույցերի զոհերի թիվը հասել է 646-ի։
