Թաիլանդի օդերևութաբանական գերատեսչությունը շարունակում է Մյանմայի երկրաշարժից հետո գրանցել հետցնցումներ, որոնց ընդհանուր թիվը հասել է 267-ի։ Այս մասին հաղորդում է ՏԱՍՍ-ը՝ վկայակոչելով գերատեսչության թարմացված հաշվետվությունը։
Ապրիլի լույս 2-ի գիշերը Մյանմայում գրանցվել են 2,4-ից մինչև 3,6 մագնիտուդով հետցնցումներ 10 կմ խորության վրա։ Այդ ստորգետնյա ցնցումները որևէ ազդեցություն չեն ունեցել Թաիլանդի վրա, ընդգծել են գերատեսչությունում։
Մյանմայի տարածքում 7,7 մագնիտուդով հուժկու երկրաշարժը տեղի է ունեցել մարտի 28-ին: Ըստ Թաիլանդի օդերևութաբանական գերատեսչության տվյալների՝ դրա մագնիտուդը կազմել է 7,9։
Մյանմայում երկրաշարժի զոհերի թիվը գերազանցել է 2800-ը: Երկրաշարժից տուժել է նաև Թաիլանդը, ուժգին ցնցումներ են զգացվել Բանգկոկում և նրա շրջակայքում, ինչպես նաև թագավորության հյուսիսային, հյուսիս-արևելյան, կենտրոնական և հարավային տարածաշրջաններում։ Բանգկոկում երկրաշարժի զոհերի թիվը հասել է 22-ի, անհետ կորած է 72 մարդ, որոնք մնացել են Գլխավոր աուդիտի գրասենյակի 30-հարկանի շենքի փլվածքների տակ:
