«Իմ քայլը» խմբակցության պատգամավոր Արման Եղոյանից լրագրողները հետաքրքրվեցին՝ նորմա՞լ է, երբ Սյունիքի ճանապարհներին ադրբեջաներենով գրված է՝ «բարի գալուստ Արբեջան»:
«Նորմալ չէ, առհասարակ շատ բան նորմալ չէ մեր երկրում», - պատասխանեց պատգամավորը:
Նա պատմեց, որ վերջին անգամ մեկ ամիս առաջ է եղել Սյունիքում և այդ ցուցանակները տեսել է:
Նրա խոսքով՝ ժայռափոր թունելից 100 մետր ներքև ռուս խաղաղապահներն են, ադրբեջանցիներ չկան:
Պատգամավորը նաև մի տուն նկարագրեց՝ բաժանված երկու մասին, որի մի հատվածում ռուս սահմանապահներն են տեղակայված, մյուսում՝ ադրբեջանցի զինվորականներ:
Եղոյանն ավելացրեց.
«Ադրբեջանցի զինվորականները թող մտածեն, որ իրենք եկել են օտար միջավայր, սահմանի բերան»:
Նա նշեց, որ Սյունիքում տեղի ունեցածը պատերազմի սպառնալիքի տակ է եղել:
