Հոկտեմբերի 22-ին Համաշխարհային օդերևութաբանական կազմակերպության արտահերթ կոնգրեսի շրջանակներում տեղի է ունեցել հանդիպում Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանի, տնօրենի գլխավոր Խորհրդական Վալենտինա Գրիգորյանի և Տաջիկստանի Հանրապետության կառավարությանն առընթեր շրջակա միջավայրի պաշտպանության կոմիտեի «Տաջիկհիդրոմետ» գործակալության տնօրեն Աբդուլլո Խաբիբուլո Քուրբոնզոդայի միջև։
Հանդիպման ընթացքում ստորագրվել է համագործակցության հուշագիր, որի նպատակն է ամրապնդել Հայաստանի և Տաջիկստանի հիդրոօդերևութաբանական ծառայությունների միջև գործընկերային կապերը և խթանել համատեղ ծրագրերի իրականացումը։
Հուշագրով նախատեսվում է համագործակցություն՝
- հիդրոօդերևութաբանության և շրջակա միջավայրի մոնիթորինգի ոլորտներում,
- փորձի և գիտամեթոդական նյութերի փոխանակման,
- վտանգավոր բնական երևույթների վաղ նախազգուշացման համակարգերի զարգացման,
- հիդրոլոգիական մոդելավորման և կանխատեսումների կատարելագործման,
- համատեղ գիտական ուսումնասիրությունների և մասնագիտական կարողությունների զարգացման ուղղություններով։
Այս համագործակցությունը կարևոր քայլ է երկու երկրների հիդրոօդերևութաբանական կառույցների միջև փոխադարձ վստահության և գիտատեխնիկական կապերի խորացման ճանապարհին։
