Գեղարքունիքի մարզի Սևան քաղաքի Բիզնես կենտրոնում կայացած հանդիպման ժամանակ խրախուսվել են Սևան համայնքի այն պահեստազորայինները, ովքեր մասնակցել են 2025 թվականի մարտի 18-ից ապրիլի 11-ը ՀՀ ՊՆ կողմից կազմակերպված վարժական հավաքներին:
Ինչպես տեղեկացրին Սևանի համայնքապետարանի աշխատակազմից, համայնքի չորս տասնյակից ավելի պահեստազորայիններ 25-օրյա վարժանքների ծառայությունից հետո արժանացել են պատվոգրերի:
Վարժական հավաքներին ակտիվորեն ներգրավվելու, բարեխիղճ ծառայության և հայրենիքի պաշտպանությանը մասնակցելու համար ՀՀ ՊՆ ՀԶԿ Գեղարքունիքի մարզի զինվորական կոմիսար Արմեն Մնացականյանը Սևան համայնքի ղեկավար Սարգիս Մուրադյանի և իր անունից պատվոգրեր է հանձնել Սևանի տարածաշրջանից վարժական հավաքների մասնակիցներին:
Պատվոգրերի հանձնման արարողությանը մասնակցել են Սևանի տարածքային զինկոմ Նաիրի Խաչատրյանը, համայնքապետարանի աշխատակազմի քարտուղար Արմենուհի Ղուկասյանը, Սևանի զինկոմիսարիատի, համայնքապտարանի աշխատակիցներ:
Ինչպես նշել են մասնակիցները, հայրենիքի պաշտպանությունն ու հայրենիքին ծառայելը չունի ժամանակի սահմանափակում, հայրենասիրությունն էլ ենթադրում է կոնկրետ գործ, կարևոր է նաև այն համագործակցված աշխատանքը, որի շնորհիվ և որի միջոցով հնարավոր է դառնում իրականացնել ցանկացած ձեռնարկ:
«Նման ձևաչափով հանդիպումը ոգևորող էր, ինչպես նաև պարտավորեցնող, բանակ-հասարակություն-համայնք համագործակցության լավագույն օրինակ, որն ունենալու է շարունակություն:
Վարժական հավաքների ընթացքում ցուցաբերած ջանասիրության և բարեխիղճ ծառայության համար մի շարք մասնակիցներ պատվոգիր են ստացել զորամասի հրամանատարության կողմից, ինչպես նաև՝ թանկարժեք նվերներ»,-ներկայացրին Սևանի համայնքապետարանի աշխատակազմից:
