Մարտի 12-ին կայացել է Սևան համայնքի ավագանու 7-րդ նստաշրջանի 2-րդ նիստը, որը վարել է համայնքի ղեկավար Սարգիս Մուրադյանը։
Ինչպես տեղեկացրին Սևանի համայնքապետարանի աշխատակազմից, օրակարգային հարցերի հաստատումից հետո համայնքի ավագանին վավերացրել է Հայաստանի Հանրապետության Սևան և Հունգարայի Հանրապետության Բալատոնալմադի քաղաքների միջև 2025 թվականի փետրվարի 26-ին ստորագրված «Քույր քաղաքներ» համագործակցության հուշագիրը:
Սարգիս Մուրադյանը նշել է, որ Սևան համայնքն ունի ապակենտրոնացված համագործակցության հարուստ փորձ՝ Սևան-Գրենոբլ (Ֆրանսիա), Սևան-Բրոդնիցա (Լեհաստան), Սևան-Ավիլիանա (Իտալիա), Սևան-Պրահա-Վինոր (Չեխիա) քույր քաղաքներ ձևաչափով:
Հաստատվել է ՀՀ Գեղարքունիքի մարզի Սևան համայնքի 2026-2028 թվականների միջնաժամկետ ծախսերի ծրագիրը, համայնքում հանրային հավաքների մասին իրազեկումների գրանցամատյանի վարման կարգը և ձևը:
Սևան համայնքի Վարսեր բնակավայրում նոր կառուցվող ամբուլատորիայի շենքի համար կատարվել է հողհատկացում:
Ավագանին մեկ այլ որոշմամբ համաձայնություն է տվել Սևան համայնքի մասնակցությանը՝ Գերմանական միջազգային համագործակցության ընկերության կողմից գործադրվող «Տեղական զարգացման հիմնադրամի» շրջանակներում դրամաշնորհային մրցույթին, որին ներկայացվող ծրագրային հայտ-առաջարկի հաստատման դեպքում համայնքի 2025 թվականի բյուջեից կկատարվի համապատասխան համաներդրում։
Համայնքի ղեկավար Սարգիս Մուրադյանն անդրադարձել է համայնքում աղբահանության դիմաց գանձվող վարձավճարներին՝ նշելով, որ «Սևան համայնքի կոմունալ սպասարկում և բարեկարգում» ՀՈԱԿ-ը, չնայած առկա խնդիրներին և հնարավորություններին, անում է հնարավորը, որպեսզի աղբահանությունը կատարվի ժամանակին, համայնքն ունենա ներկայանալի տեսք:
Ներկայացվել են 2025 թվականի համար համայնքի կողմից ներկայացված և հավանության արժանացած սուբվենցիոն ծրագրերը, որոնք ներառում են ճանապարհաշինարարական աշխատանքներից մինչև բնակավայրերի ոռոգման ցանցերի կառուցում:
Ավագանու նիստի ընթացքում քննարկվել են ՀՈԱԿ-ների տնօրենների, բնակավայրերի վարչական ղեկավարների, ֆիզիկական և իրավաբանական անձանց կողմից համայնքի ավագանուն հասցեագրված զեկուցագրերը և դիմումները, որոնք ստացել են սպառիչ պատասխան՝ համապատասխան որոշումների ընդունմամբ:
