Երևանի ավագանու «Ազգային առաջընթաց» խմբակցության անդամ Հովսեփ Կուբատյանի գրառումը. «Մի կողմից Տիգրան Ավինյանը հանձնարարում է մաքրել կանաչ տարածքները գովազդային վահանակներից, մյուս կողմից՝ ամենականաչ հատվածներից մեկում տեղադրվում է նոր վահանակ։ Սենց էլ անորոշ վիճակ։
Ապրիլի 21-ի խորհրդակցության ժամանակ Տիգրան Ավինյանը հայտարարել է․ «Մենք, ընդհանուր առմամբ, կարգավորման բավականին խիստ դաշտ ենք սահմանել գովազդների համար, ինձ թվում է 2 լրացումներ ունենք անելու, որոնք որ չունենք կարգավորված։ Առաջին լրացումը այն մասին պետք է լինի, որ, համենայնդեպս, հետագայում, ԱՅՍ ԿԵՏԻՑ ՍԿՍԱԾ՝ հողային հատվածներում, գազոնի համար նախատեսված հատվածներում Երևանի քաղաքապետարանը ուղղակի հնարավորություն չունենա տալու գովազդային վահանակ, կրիչ, որևէ բան։ Այսինքն՝ այն հատվածներում, որտեղ կանաչապատման ՀՈԱԿ-ը պետք է գործի։ Այդ հատվածներից եկեք առհասարակ բացառենք՝ ավագանու որոշմամբ»։
Այսօր Սայաթ-Նովա փողոցով անցնելիս նկատեցի, որ կանաչ տարածքում տեղադրվում է նոր գովազդային վահանակ։
Համաձայն Երևանի քաղաքապետի 09 դեկտեմբերի 2024 թ. N 4748-Ա որոշման՝ գովազդային վահանակների տեղադրման նպատակով «Ին Շին» ՍՊԸ-ին կառուցապատման իրավունքով տրամադրվել է երկու հողամաս՝ Խանջյան փողոցի հ.1 և Սայաթ-Նովայի պողոտայի հ.7 հասցեներին կից։ Ի դեպ հողատարածքները ընդգրկված են հողային օրենսգրքի 60-րդ հոդվածով նախատեսված սահմանափակումների ցանկում։
Փաստորեն ստացվում է, որ մի կողմից Տիգրան Ավինյանը հանձնարարում է, որ սահմանվեն այնպիսի չափորոշիչներ, որոնք կբացառեն կանաչ գոտիներում վահանակների տեղադրումը, մյուս կողմից՝ դրանից օրեր անց քաղաքի ամենակենտրոնական և ամենականաչ հատվածներից մեկում տեղադրվում է նոր վահանակ, ճիշտ է` մի քանի ամիս առաջ տրամադրված թույլտվությամբ։
Ու քանի որ «Ին Շին» ՍՊԸ-ին վահանակների համար հողահատկացման որոշման մեջ ներառված են այնպիսի կետեր, որոնցով քաղաքապետարանը կարող է Ավագանու որոշումը ընդունելուց հետո խզի պայմանագիրը, հետամուտ եմ լինելու, որ քաղաքապետարանը գնա այդ քայլին և ապամոնտաժի այս այլանդակությունը։ Ինչպես նաև հարց է առաջ գալիս, նույն կանաչ գոտում տեղադրված մեկ այլ ահռելի չափերի վահանակի ապամոնտաժման կապակցությամբ։
Հետաքրքիր է նաև, որ իմ հարցմանը ի պատասխան՝ Երևանի քաղաքապետարանից տեղեկացրել են, որ «Ին Շին» ՍՊԸ-ի ոչ մի գովազդային վահանակ 2024-2025 թթ. ընթացքում չի ապամոնտաժվել։ Այսինքն, այս թույլտվությունը քաղաքապետարանի և մասնավորի միջև փոխզիջումային պայմանավորվածության արդյունք չէ։ Նման պայմանավորվածություններ ձեռք են բերվում այն դեպքում, երբ հեռացվում են տնտեսավարողներին պատկանող այն գովազդային վահանակները, որոնք չեն համապատասխանում գովազդի նոր չափորոշիչներին և որպեսզի ընկերությունը մեծ վնասներ չկրի ու կարողանա կատարել արդեն իսկ ստանձնած պայմանագրային պայմանավորվածությունները, վերջինիս տրամադրվում են թույլտվություններ նոր վահանակներ տեղադրելու համար, որոնք կհամապատասխանեն նոր չափորոշիչներին։
Նման պայմանավորվածություն կարելի է ձեռք բերել նաև այս վահանակի համար և այն տեղափոխել մեկ այլ՝ «անշառ» վայր։
Հ․Գ․ Անձամբ ճանաչում եմ այս ոլորտը համակարգող փոխքաղաքապետ Սուրեն Գրիգորյանին և ԻՐ ՄԱՍՈՎ վստահ եմ, որ վահանակների տեղադրումը կոռուպցիոն գործարքի արդյունք չէ։ Նաև հանուն ճշմարտության պետք է նշեմ, որ մեծ աշխատանք է կատարվել քաղաքը այլանդակ բիլբորդներից մաքրելու ուղղությամբ։ Սակայն նման թույլտվությունները մեծ ստվեր են գցում արդեն իսկ իրականացրած աշխատանքների վրա։
