Ատոմային էներգիայի միջազգային գործակալությունը (ԱԷՄԳ), չնայած կոչերին, դեռեւս չի ներկայացրել լիարժեք զեկույց՝ Իրանի միջուկային օբյեկտներին հարվածների հետեւանքների հստակ, օբյեկտիվ գնահատականով, երկուշաբթի «ՌԻԱ Նովոստիին» ասել է Վիեննայում գտնվող միջազգային կազմակերպություններում Ռուսաստանի Դաշնության մշտական ներկայացուցչի տեղակալ Ռոման Ուստինովը։ Ավելի վաղ Ռուսաստանի արտաքին գործերի նախարարությունը հայտնել էր, որ ակնկալում է, որ Ատոմային էներգիայի միջազգային գործակալությունը (ԱԷՄԳ) արագ եւ պրոֆեսիոնալ արձագանք կտա Իրանի միջուկային օբյեկտներին հասցված հարվածներին։ Մոսկվան կոչ էր արել կազմակերպության գլխավոր տնօրեն Ռաֆայել Գրոսիին օբյեկտիվ զեկույց ներկայացնել։ «Այժմ խոսքը մի իրավիճակի մասին է, որն անմիջականորեն ազդում է ԱԷՄԳ մանդատի էության վրա։ Մենք գործ ունենք գործակալության պաշտպանության ներքո գտնվող միջուկային օբյեկտների վրա թիրախային հարձակումների հետ։ Այս օբյեկտները ստուգվել են տեսուչների կողմից, եւ դրանց վերաբերյալ որեւէ բողոք չի եղել. բոլոր միջուկային նյութերն օգտագործվել են բացառապես խաղաղ նպատակներով։ Այսպիսով, ԱԷՄԳ երկու հիմնական գործառույթներն էլ սպառնալիքի տակ են. միջուկային էներգիայի խաղաղ օգտագործումը եւ վերահսկումը, որ այն չօգտագործվի ռազմական նպատակներով։ Եվ այս համատեքստում գործակալությունը պարտավոր է հստակ դիրքորոշում որդեգրել»,- ասել է Ուստինովը։ Նրա խոսքով՝ նման դիրքորոշումը սովորաբար արտահայտվում է բանաձեւի տեսքով։ «Մենք կարծում ենք, որ պետք է տրվի հստակ գնահատական՝ դատապարտելով միջուկային օբյեկտների վրա հարձակումները, այս դեպքում՝ Իրանում։ Գլխավոր տնօրենը հղում է կատարում Գլխավոր կոնֆերանսի բանաձեւերին, որոնք խոսում են նման օբյեկտների վրա հարձակումների անթույլատրելիության մասին։ Դրանց շրջանակում նա լիազորություն ունի ՄԱԿ Անվտանգության խորհրդին եւ ԱԷՄԳ կառավարիչների խորհրդին զեկուցել տեղի ունեցողի մասին։ Ցավոք, դա դեռեւս տեղի չի ունենում։ Չնայած շատ երկրներ արդեն իսկ արտահայտվել են պաշտոնական զեկույցի անհրաժեշտության օգտին»,- նշել է դիվանագետը։ Նա ընդգծել է, որ գործակալության կայքի տեղեկատվության ամփոփագրերը բավարար չեն, հատկապես շարունակվող հարվածների եւ աճող լարվածության համատեքստում: «Ռուսաստանը պնդում է ԱԷՄԳ լիարժեք զեկույցի անհրաժեշտությունը, որը կտա հստակ եւ օբյեկտիվ գնահատականիրադարձություններին եւ կներկայացնի ԱՄՆ-ի եւ Իսրայելի կողմից Իրանի միջուկային օբյեկտներին հասցված հարվածների հետեւանքների պատկերը»,- եզրափակել է Ուստինովը: Ինչպես տեղեկացվել էր ավելի վաղ, երկուշաբթի առավոտյան ԱԷՄԳ գլխավոր տնօրեն Ռաֆայել Գրոսիի նախաձեռնությամբ տեղի է ունեցել գործակալության Կառավարիչների խորհրդի նստաշրջանը՝ Իրանի միջուկային օբյեկտներին ԱՄՆ հասցրած հարվածների թեմայով։
