Ռուսաստանի քաղաքացիները կարող են Իրանից ցամաքային ճանապարհով հեռանալ Հայաստանով, հայտնել է Երեւանում Ռուսաստանի դեսպանատունը։ Մենք տեղեկացնում ենք Ռուսաստանի քաղաքացիների համար Իրանից Հայաստան ցամաքային ճանապարհով մեկնելու լրացուցիչ տարբերակների մասին՝ իրանա-հայաստանյան սահմանի «Նորդուզ»/«Ագարակ» սահմանային անցակետով, նշվել է դիվանագիտական առաքելության Telegram-ալիքի հայտարարությունում։ Դեսպանատանն ավելացրել են, որ Իրանի եւ Հայաստանի միջեւ սահմանը բաց է Ռուսաստանի քաղաքացիների համար, անցումը անվճար է օտարերկրյա կամ ներքին վավեր անձնագրերով, նախնական ծանուցում չի պահանջվում։ Դիվանագիտական առաքելությունը նաեւ մանրամասն տեղեկատվություն է տրամադրել Մեղրիից Երեւան, ապա՝ Ռուսաստան հասնելու վերաբերյալ։ Մասնավորապես, մասնավոր ավտոբուսներն ամեն օր մեկնում են Հայաստանի մայրաքաղաք. մեկնումը՝ ժամը 07:30-ին Մեղրիի քաղաքային հրապարակից, մեկ տեղի արժեքը 5 հազար դրամ է (13 դոլար)։ «Ագարակ» անցակետից տաքսիներ են մեկնում Երեւան, տեւողությունը՝ 7,5 ժամ, հեռավորությունը՝ 328 կիլոմետր, արժեքը՝ մոտ 50 հազար դրամ (130 դոլար) կամ մեքենայում մեկ տեղի համար՝ 10 հազար դրամ (26 դոլար)։Մեղրիից Կապան կարելի է հասնել նաեւ տաքսիով (1.5 ժամ ճանապարհ դեպի Երեւան, արժեքը՝ 12 հազար դրամ, (31 դոլար), որի օդանավակայանից երկուշաբթիից ուրբաթ ժամը 13:00-ին կանոնավոր չվերթ է իրականացվում դեպի Երեւան։ Օրական մինչեւ 20 ուղիղ չվերթ է իրականացվում Երեւանից Ռուսաստան՝ մի քանի ավիաընկերությունների կողմից։ «Խորհուրդ է տրվում ուշադիր հետեւել ռուսաստանյան արտասահմանյան հաստատությունների, ավիաընկերությունների եւ տուրօպերատորների հաղորդագրություններին/զգուշացումներին։ Անհրաժեշտության դեպքում զանգահարել արտակարգ իրավիճակների հեռախոսահամարով»,- ընդգծել են դեսպանատանը։
