«Ժողովուրդ» օրաթերթը գրում է. ««Ժողովուրդ» օրաթերթի տեղեկություններով՝ Կոտայքի մարզում ՔՊ-ի առաջիկա ՏԻՄ ընտրությունների թեկնածուների հարցում պատկերը ամբողջությամբ չի ուրվագծվում։ Եթե Հրազդանի, Ծաղկաձորի և Արզնիի մասով իշխանությունն արդեն որոշակի որոշումներ ունի, ապա ամենամեծ հարցականը շարունակում է մնալ Աբովյանը։
Իշխանական մեր աղբյուրների փոխանցմամբ՝ երկար քննարկումներից հետո ՔՊ-ում, կարծես թե, կանգ են առել Հովհաննես Աբրահամյանի թեկնածության վրա։
Նա «Հայանտառ» ՊՈԱԿ-ի «Հրազդանի անտառտնտեսություն» մասնաճյուղի ղեկավարն է։
Սակայն ուշագրավն այն է, որ ՔՊ-ն Աբովյանի գործող քաղաքապետ Էդուարդ Բաբայանի հարցում այլ մարտավարություն է ընտրել։ «Ժողովուրդ» օրաթերթի տեղեկություններով՝ իշխանությունը մտադիր չէ նրա դեմ կոշտ պայքար մղել կամ բանակցությունների միջոցով նրան ՔՊ-ի թեկնածու դարձնել։ Ընդհակառակը՝ Բաբայանին, ըստ իշխանական աղբյուրների, «ազատ են թողնելու»։
Այսինքն՝ Էդուարդ Բաբայանը, ամենայն հավանականությամբ, կմասնակցի ընտրություններին սեփական նախաձեռնությամբ, իսկ ՔՊ-ն, ըստ էության, չի խոչընդոտի նրա ընտրարշավին։
Ավելին՝ իշխանական մեր աղբյուրները պնդում են, որ ՔՊ-ում բավական իրատեսական գնահատական կա՝ Աբովյանում Էդուարդ Բաբայանի ավելի մեծ ընտրազանգված ունի, հաղթանակի մեծ շանսեր, քան իշխանության կողմից առաջադրվելիք թեկնածու Հովհաննես Աբրահամյանը։ Հենց այս հանգամանքով էլ պայմանավորված՝ ՔՊ-ում որոշել են ոչ թե գնալ Բաբայանի հետ մրցակցության կամ նրան իրենց թեկնածու դարձնելու բանակցությունների, այլ նրան թողնել ազատ, սեփական ճանապարհով։
Իշխանական շրջանակներում, ըստ մեր տեղեկությունների, քննարկվում է նաև այն սցենարը, որ եթե Էդուարդ Բաբայանը հաղթի ընտրություններում, ՔՊ-ն կընդունի այդ արդյունքը և նրա համար հաղթանակի հարցում խնդիրներ չի ստեղծի։ Կաշխատեն Բաբայանի հետ, ինչպես՝ այսօր»։
Մանրամասները՝ «Ժողովուրդ» օրաթերթի այսօրվա համարում։
