Իրանի գերագույն առաջնորդ այաթոլլա Ալի Խամենեիի գլխավոր խորհրդական Ալի Լարիջանին փետրվարի 10-ին Օմանում կայացած բանակցությունների ժամանակ քննարկել է Միացյալ Նահանգների հետ «հավասարակշռված և արդար» համաձայնագրի հասնելու ուղիները։ Այս մասին հաղորդում է Օմանի լրատվական գործակալությունը (ONA)։
Օմանի Սուլթան Հայթամ բին Տարիկն Ալի Լարիջանիին ընդունել է փետրվարի 10-ի առավոտյան, ալ-Բարաքա պալատում։ Հանդիպման ընթացքում Ալի Լարիջանին Օմանի սուլթանին է փոխանցել Իրանի նախագահ Մասուդ Փեզեշքիանի ողջույնները։ Կողմերը քննարկել են Իրան-ԱՄՆ բանակցությունների վերջին զարգացումները։ Նաև ընդգծվել է բանակցությունների սեղանի շուրջ վերադառնալու, տեսակետները կամրջելու և տարաձայնությունները խաղաղ ճանապարհով լուծելու կարևորությունը՝ տարածաշրջանում և աշխարհում խաղաղություն ու անվտանգություն հաստատելու համար։
Իրանական լրատվամիջոցները հայտնել են, որ հանդիպումը տևել է գրեթե երեք ժամ։
Reuters-ի փոխանցմամբ՝ Օմանի միջնորդությամբ փետրվարի 6-ին Իրանի և ԱՄՆ-ի միջև կայացած անուղղակի բանակցություններն, ըստ Իրանի արտաքին գործերի նախարարության խոսնակի, թույլ են տվել Թեհրանին գնահատել Վաշինգտոնի լրջությունը և ցույց են տվել բավարար կոնսենսուս դիվանագիտությունը շարունակելու համար։
Էսմայիլ Բաղային նշել է, որ Լարիջանիի այցն Օման նախապես պլանավորված էր, և որ նա Օմանի այցից հետո կմեկնի Կատար։
ԱՄՆ-Իրան բանակցությունների հաջորդ փուլի ամսաթիվը և վայրը դեռևս չեն հայտարարվել։
