Սպասվում է, որ ՀՀ բյուջեի դեֆիցիտը 2025թ. կկազմի ՀՆԱ 5,5 տոկոսը։ Այս մասին Ազգային ժողովում, Հայաստանի եւ Զարգացման ֆրանսիական գործակալության միջեւ կնքված վարկային համաձայնագրի վավերացման նախագծի քննարկման ժամանակ, հոկտեմբերի 23-ին ասել է ֆինանսների նախարար Վահե Հովհաննիսյանը։
Նրա խոսքով՝ ներգրավվող միջոցները պետք է ուղղված լինեն կապիտալ ծախսերին կամ այն միջոցներին, որոնք բարձրացնում են տնտեսության պոտենցիալը երկարաժամկետ հեռանկարում։
«Պետբյուջեի դեֆիցիտը 2024թ. կազմում է ՀՆԱ 4,6 տոկոսը, ինչը բարձր է դեֆցիտի ընդհանուր ընդունված մակարդակից 3 տոկոսով։ Այնուամենայնիվ, մենք սահմանել ենք դեֆիցիտի մակարդակ կարեւոր նախագծերի ֆինանսավորման, ինչպես նաեւ Լեռնային Ղարաբաղից բռնի տեղահանված մեր հայրենակիցների սոցիալական եւ բնակարանային խնդիրների լուծման համար»,- նշել է նախարարը։
Նա ընդգծել է, որ 483 մլրդ դրամ դեֆիցիտի պայմաններում կառավարությունը կապիտալ ծախսերը սահմանել է 700 մլրդ դրամի չափով։ «Այսինքն դեֆիցիտը գերազանցող գումարն ուղղվել է երկրի տնտեսության եւ անվտանգության ենթակառուցվածքի բարելավմանը», նշել է կառավարության ներկայացուցիչը։
