Ամերիկացի եւ չինացի բարձրաստիճան դիվանագետները Պեկինում «անկեղծ եւ արդյունավետ» բանակցություններ են անցկացրել եւ պայմանավորվել են կապի բաց գծեր պահպանել՝ լարվածությունը հակամարտության վերաճելուց խուսափելու համար, հաղորդում է The Associated Press-ը՝ վկայակոչելով պաշտոնական աղբյուրները:
ԱՄՆ պետքարտուղարի՝ Արեւելյան Ասիայի եւ Խաղաղ օվկիանոսի հարցերով օգնական Դենիել Քրիթենբրինքը եղել է ԱՄՆ-ի ամենաբարձրաստիճան պաշտոնյան, որը երկուշաբթի այցելել է Չինաստան՝ փետրվարի սկզբին ԱՄՆ-ի երկնքում չինական օդապարիկի խոցման հետ կապված Վաշինգտոնի եւ Պեկինի միջեւ լարվածության աճից հետո, հաղորդում է ԶԼՄ-ները:
ԱՄՆ պետքարտուղար Էնթոնի Բլինքենն այն ժամանակ հետաձգել էր նախատեսված այցը Չինաստան, եւ այդ ժամանակից ի վեր Պեկինը հիմնականում մերժել է կարծիքների պաշտոնական փոխանակման փորձերը՝ թեեւ ԱՄՆ-ի եւ Չինաստանի պաշտպանական գերատեսչությունների երկու բարձրաստիճան ներկայացուցիչներ հանգստյան օրերին Սինգապուրում կայացած համաժողովում հակիրճ շփվել են:
Չինաստանի արտաքին գործերի նախարարությունը հայտնել է, որ Քրիթենբրինքը եւ փոխարտգործնախարար Մա Չժաոսույը «անկեղծ, կառուցողական եւ արդյունավետ հաղորդակցություն են անցկացրել Չինաստանի եւ ԱՄՆ-ի միջեւ հարաբերությունների բարելավմանը նպաստելու եւ տարաձայնությունների պատշաճ կարգավորման վերաբերյալ»։
Պեկինը հայտարարել է, որ ներկայացրել է Թայվանի վերաբերյալ իր դիրքորոշումը, եւ որ երկու կողմերը պայմանավորվել են պահպանել կապը։
