Խորհրդարանը քննարկում է Ժամկետային զինվորական կամ այլընտրանքային ծառայության հերթական զորակոչից, վարժական հավաքից կամ զորահավաքային զորակոչից խուսափած անձանց նկատմամբ համաներում հայտարարելու մասին օրենքի նախագիծն առաջին ընթերցմամբ ընդունելու հարցը։
«Նախատեսվում է համաներում հայտարարել 27 տարին լրացած շարքային և 35 տարին լրացած պահեստազորի սպաների նկատմամբ, եթե նրանք մինչև 2020 թվականի սեպտեմբերի 26-ը ներառյալ խուսափել են ժամկետային զինվորական կամ այլընտրանքային ծառայության հերթական զորակոչից, վարժական հավաքից կամ զորահավաքային զորակոչից» -ասաց ՀՀ արդարադատության նախարարի տեղակալ Արմեն Հովհաննիսյանը։
«Հարկ եմ համարում նշել, որ առաջինից երկրորդ ընթերցում հատվածում նախատեսվում է որոշ փոփոխություններ իրականացնել։ Ըստ փոփոխությունների, սեպտեմբերի 26-ի փոխարեն կգործի այն ամսաթիվը, երբ սույն օրենքը ուժի մեջ կմտնի։ Այսինքն՝ մինչև այս օրենքի ուժի մեջ մտնելը 27 տարեկան դարձած քաղաքացիների համար օրենքը կգործի»,- նշեց նա։
Նախագծով առաջարկվում է համաներում հայտարարելով՝ պատժից ազատել այն անձանց.
- որոնք դատապարտվել են ազատությունից զրկելու հետ կապված պատժի,
- որոնց նկատմամբ պատիժը պայմանականորեն չի կիրառվել, կամ պատժի կրումը հետաձգվել է,
- որոնք դատապարտվել են ազատությունից զրկելու հետ չկապված պատժի:
