Պակիստանի մի շարք հայտնի քաղաքական եւ հասարակական գործիչներ կոչ են արել երկրի կառավարությանը չեղարկել ԱՄՆ նախագահ Դոնալդ Թրամփին 2026թ. խաղաղության Նոբելյան մրցանակի առաջադրելու առաջարկը։ Ինչպես տեղեկացրել է «Press Trust of India» գործակալությունը, պակիստանցի քաղաքական գործիչները կարծում են, որ Իսլամաբադի առաջարկը՝ Թրամփին խաղաղության Նոբելյան մրցանակի առաջադրելու վերաբերյալ, առնվազն անտեղի է Իրանին ռմբակոծելու նրա հրամանից հետո։ «ԱՄՆ նախագահի պնդումները իր սեփական խաղաղապահ ջանքերի մասին սուտ դուրս եկան։ Պակիստանի կողմից Թրամփի Նոբելյան խաղաղության մրցանակի առաջադրումը պետք է չեղարկվի, մեջբերել է գործակալությունը «Ջամիաթ Ուլեմա-ի-Իսլամ» կուսակցության առաջնորդ Մաուլանա Ֆազլուր Ռեհմանի խոսքերը։ «Թրամփն աջակցել է Իսրայելի հարձակումներին Պաղեստինի, Սիրիայի, Լիբանանի եւ Իրանի վրա։ Ինչպե՞ս կարելի է սա համարել խաղաղության ցանկություն»։Նախկին սենատոր Մաշահիդ Հուսեյնը Իրանին հարվածելու որոշումն անվանել է ԱՄՆ նախագահի «ամենամեծ սխալը» պաշտոնը ստանձնելուց ի վեր: «Թրամփը չի կարող խաղաղարար համարվել այն բանից հետո, երբ նա պատերազմ է սկսել Իրանի դեմ: Պակիստանի կառավարությունը պետք է չեղարկի նամակը Թրամփին Նոբելյան խաղաղության մրցանակի առաջադրելու մասին»,- գրել է քաղաքական գործիչը X սոցցանցում: Նմանատիպ կոչեր Պակիստանի կառավարությանն արել են նաեւ ընդդիմադիր «Արդարության շարժում» կուսակցության խորհրդարանի անդամ Ալի Մուհամադ Խանը, «Ջամահաթ-ի-Իսլամի» կուսակցության ղեկավար Նաիմուր Ռեհմանը, ԱՄՆ-ում Պակիստանի նախկին դեսպան Մալիհա Լոդհին, մի շարք հայտնի լրագրողներ եւ ականավոր հասարակական գործիչներ։
