ՌԴ փոխվարչապետ Ալեքսեյ Օվերչուկը լրագրողներին հայտնել է, որ հաջորդ շաբաթ ադրբեջանական կողմի հետ կքննարկի Հարավային Կովկասում տրանսպորտային հաղորդակցությունների ապաշրջափակման հարցերը։ Այս մասին հայտնում է TASS-ը։
«Հաջորդ շաբաթվա վերջին ես նաև հանդիպում ունեմ ադրբեջանական կողմի հետ։ Մենք այնտեղ նույնպես կքննարկենք այդ հարցերը [Հարավային Կովկասում տրանսպորտային հաղորդակցությունների ապաշրջափակումը]։ Այնպես որ, շարժ կա»,- ասել է նա։
«Այն կլինի Ռուսաստանում», -հանդիպման վայրի մասին հարցին պատասխանել է Օվերչուկը։
Փոխվարչապետը նշել է, որ գոյություն ունի եռակողմ աշխատանքային խումբ՝ Ադրբեջանի, Հայաստանի և Ռուսաստանի փոխվարչապետների մակարդակով, որն աշխատում է ՌԴ, Ադրբեջանի, Հայաստանի ղեկավարների եռակողմ հայտարարության իններորդ կետի իրականացման ուղղությամբ և մանրամասն քննարկել է ապաշրջափակման բոլոր նյուանսները։
«Ուստի մեզ, իհարկե, հետաքրքիր է իմանալ, թե կողմերն ինչքանով են առաջընթաց գրանցել այն խնդիրների լուծման հարցում, որոնք քննարկվել են եռակողմ աշխատանքային խմբի շրջանակներում։ Որոշ նրբություններ շոշափում են Հարավային Կովկասում ՌԴ-ի շահերը, առաջին հերթին երկաթուղային հաղորդակցության զարգացման տեսանկյունից։ Ուստի մեզ համար շատ հետաքրքիր կլինի լսել, թե արդյոք գտնվել են լուծումներ այդ նյուանսների վերաբերյալ»,- ընդգծել է նա։
«Այդ դեպքում, իհարկե, եթե այս բոլոր հարցերը լուծված են, ապա մենք պետք է արդեն դա տեղափոխենք տեխնիկատնտեսական հիմնավորումների հաշվարկների հարթություն, դիտարկենք այս նախագծերի տնտեսությունը և զբաղվենք ապաշրջափակմամբ։ Բայց դա կրկին կպահանջի եռակողմ ջանքեր՝ մեր, Հայաստանի ու Ադրբեջանի հետ փոխգործակցության շրջանակում, որը եղել է և կա»,- եզրափակել է Օվերչուկը։
