Հայաստանի Ազգային ժողովի արտաքին հարաբերությունների մշտական հանձնաժողովը հավանություն տվեց Օմանի, Կոլումբիայի և Դոմինիկանայի հետ բարեկամական խմբեր ստեղծելու հարցերին: Հանձնաժողովի նիստում առաջարկներն ընդունվեցին միաձայն:
«Օմանի հետ բավականին ակտիվ երկխոսություն է սկսել Հայաստանը, նախորդ տարի Օմանում Հայաստանի Հանրապետությունը բացել է ռեզիդենտ դեսպանություն»,- ասաց հանձնաժողովի նախագահ Սարգիս Խանդանյանը:
Անդրադառնալով Կոլումբիային՝ Սարգիս Խանդանյանը հայտնեց, որ բարեկամական խումբ ստեղծելու առաջարկը եկել է կոլումբիական կողմից:
«Կոլումբիական կողմը շահագրգռված է միջխորհրդարանական կապերն ամրապնդելու հարցում»,- ընդգծեց նա։
Դոմինիկանայի Հանրապետության հետ բարեկամական խումբ ստեղծելու գաղափարն առաջացել է երկու երկրի պատգամավորների հանդիպման ընթացքում:
