Կրթության, գիտության, մշակույթի և սպորտի նախարարության նախաձեռնությամբ Երևանի քաղաքապետարանն ապամոնտաժել է Մյասնիկյան պողոտայում գտնվող Երևանի պատմական կամուրջներից մեկի՝ Նորքի (Գետառի) կամրջի շուրջ կառուցված ինքնակամ պարիսպները:
ԿԳՄՍ-ից հայտնում են, որ պարիսպներն ամբողջությամբ փակել էին դեպի կամուրջ մուտքը և այն անհասանելի դարձրել այցելության համար:
«Հաշվի առնելով կամրջի ներկայիս վիճակը՝ ԿԳՄՍ նախարարությունն առաջիկայում կնախաձեռնի կամրջի նորոգման, ամրակայման և վերականգնման գիտանախագծային փաստաթղթերի մշակումը, ապա՝ նորոգումն ու տարածքի բարեկարգումը»,-նշված է գերատեսչության տարածած հաղորդագրության մեջ:
Ըստ Հայաստանի պատմության թանգարանում պահվող արձանագրության՝ կամուրջը կառուցվել է 1664 թ. նորքեցի Հովհաննես վարդապետի միջոցներով. ճարտարապետը Գրիգորի որդի Կիրակոսն է:
Կամուրջը նախկինում Երևանը կապել է Ավան գյուղին․ դրա վրայով են անցել նաև դեպի Սևան, Վրաստան, Ռուսաստան գնացող առևտրական քարավանները: 1965 թ. կամուրջը վերանորոգել է Հայաստանի հուշարձանների պահպանության վարչությունը:
Երևանի պատմական կամուրջներից մյուսը՝ Կարմիր կամուրջը, պետություն-մասնավոր համագործակցության շրջանակում արդեն վերականգնվել է:
