Բազմաթիվ սադրիչ հայտարարություններ եղան, և դեռ կլինեն։ Ռուսաստանի ԱԳՆ պաշտոնական ներկայացուցիչ Մարիա Զախարովան այսպես է մեկնաբանել Ադրբեջանի նախագահ Իլհամ Ալիևի վերջին հայտարարությունը Հայաստանի հետ սահմանի սահմանազատման հարցի վերաբերյալ։
Նշենք, որ Ադրբեջանի ղեկավարը հունվարի 10-ին տեղական հեռուստաալիքներին տված հարցազրույցում ասել է, որ եթե Հայաստանը շարունակի «խուսափել» սահմանազատումից, ապա այն «կանցնի այնտեղով, որտեղով Ադրբեջանը հարմար կգտնի»։
«Նման մարդիկ, նման հայտարարություններ շատ կլինեն։ Նրանց թիվը ահռելի է, և դրանք շատ կլինեն։ Գիտեք, թե քանի ուժեր են կապված, շահերը հատվում են, կողմերը կռվում են։ Դուք դա շատ լավ գիտեք, դա գիտի նաև տարածաշրջանը։ Հետևաբար, կլինեն բազմաթիվ հայտարարություններ»,- նշել է դիվանագետը։
Լրագրողների համար ամենշաբաթյա ճեպազրույցի ժամանակ Զախարովային հարցրել են, թե արդյոք Ալիևի սպառնալիքները արդյունք են այն բանի, որ Հայաստանի ՀԱՊԿ դաշնակիցները հստակ քաղաքական գնահատական չեն տվել անցյալ տարվա սեպտեմբերի կեսերին հարևան երկրի դեմ Ադրբեջանի ագրեսիային։ ՌԴ ԱԳՆ ներկայացուցչի խոսքով՝ Մոսկվայից բազմաթիվ մեկնաբանություններ են եղել՝ կապված այս հարցի հստակ արձագանքի հետ։
«Պետք է վերադառնալ տարրական բաներին, և այս առումով ռուսական կողմը կցանկանար հասկանալ հայկական կողմի «հստակ արձագանքը» հիմնարար հարցերի վերաբերյալ»,- ընդգծել է ՌԴ ԱԳՆ-ն՝ վստահություն հայտնելով, որ «մենք պետք է սկսենք սրանից»:
«ՀԱՊԿ-ի արձագանքը եղել է։ Ես չեմ կարող այն անհասկանալի անվանել: Եթե դա չի համընկել կարգավորման մեջ ներգրավված մի շարք քաղաքական գործիչների տեսակետների հետ, դա չի նշանակում, որ եղել է ոչ հստակ արձագանք։ Կողմերի միջև կան պայմանավորվածություններ, նախանշվել է ծրագիր և գործողությունների ընթացք։ Պետք չէ դրանք թողնել»,- հայտնում է Զախարովան։
