ՀՀ ՆԳՆ Ներքին անվտանգության և հակակոռուպցիոն վարչությունում առաջին անգամ պաշտոնի նշանակվելու գործընթացում ներդրված նոր կարգով թեկնածուները բարեվարքության վերաբերյալ կլրացնեն հարցաթերթիկ, ինչը կգնահատվի Կոռուպցիայի կանխարգելման հանձնաժողովի կողմից։
Այս մասին հայտնում են Ներքին գործերի նախարարությունից, ընդգծելով, որ արդեն իսկ ներկայացված դիմումների հիման վրա համապատասխան հարցաթերթերը փոխանցվել են հանձնաժողովին և ստացվել են դրական եզրակացություններ։ Դրական արդյունքների հիման վրա ծառայողները կնշանակվեն համապատասխան պաշտոնների։
Նշվում է, որ փոփոխությունը կնպաստի Ներքին անվտանգության և հակակոռուպցիոն վարչության ծառայողների բարեվարք գործունեության ապահովմանը՝ հնարավորինս կանխելով բարեվարքության համակարգի տարրերին վերաբերելի խախտումները և բարձրացնելով ծառայության նկատմամբ վստահության մակարդակը։
