Ուկրաինական հողում ՆԱՏՕ զորքերի առկայությունը ցանկացած դրոշի ներքո եւ ցանկացած կարգավիճակով սպառնալիք է Ռուսաստանի համար։ Այս մասին ՌԴ ԱԳ նախարար Սերգեյ Լավրովը հայտնել է ամերիկացի բլոգերներ Մարիո Նաուֆալին, Լարի Ջոնսոնին եւ Էնդրյու Նապոլիտանոյին տված հարցազրույցում, տեղեկացրել է ՏԱՍՍ-ը։ «Եթե ՆԱՏՕ ընդլայնումը, համենայն դեպս, Դոնալդ Թրամփի կողմից ճանաչվի որպես հիմնական պատճառներից մեկը, ապա ուկրաինական հողում ՆԱՏՕ զորքերի առկայությունը ցանկացած դրոշի ներքո, ցանկացած կարգավիճակով, նույնպիսի սպառնալիք է մեզ համար»,- նշել է նախարարը։ Հարցին, թե ինչ պայմաններով Ռուսաստանը կկարողանար ընդունել ՆԱՏՕ երկրների զինվորականներին որպես խաղաղարարներ Ուկրաինայում, Լավրովը պատասխանել է միանշանակ հրաժարմամբ համապատասխան նախաձեռնության զարգացման ցանկացած տարբերակից։«Ոչ մի պայմանով։ Ոչ ոք մեզ հետ չի խոսում։ Նրանք շարունակում են պնդել, որ Ուկրաինայի մասին ոչինչ առանց Ուկրաինայի, բայց անում են ամեն ինչ Ռուսաստանի դեմ առանց Ռուսաստանի։ Երբ ԱՄՆ նախագահ Դոնալդ Թրամփին հարցրել են խաղաղարարների մասին, նա պատասխանել է, որ դեռ չափազանց վաղ է քննարկել դա, բայց սովորաբար պահանջվում է բոլոր կողմերի համաձայնությունը։ Ինչո՞ւ մենք պետք է համաձայնություն տանք խաղաղարար ուժերին կամ որեւէ խաղաղարար խմբի։ Նրանք ցանկանում են, որ այդ ուժը բաղկացած լինի այն երկրներից, որոնք մեզ թշնամի են հայտարարել։ Նրանք այնտեղ կգան որպես խաղաղարարնե՞ր»,- եզրափակել է ՌԴ ԱԳ նախարարը։
