ԲՏԱ նախարար Մխիթար Հայրապետյանը ՏՏ ոլորտը կարգավորող նոր օրենսդրական փաթեթի վերաբերյալ խորհրդարանական լսումների ժամանակ հայտարարել է, թե այդ ոլորտի զարգացմանը նպաստող օրենսդրությունը հրամայական է։
«Օրենքը, որ պետք է գա խթանելու այս ոլորտին, նախ և առաջ մեր ռազմավարական նպատակների մասին է»,- ասել է նա՝ հիշեցնելով, որ վերջին տարիներին հաճախ են խոսում Հայաստանի՝ բարձր տեխնոլոգիական արդյունաբերության երկիր դառնալու մասին. «Մոլորակի ևս 200 երկիր այդօրինակ հայտարարությամբ կարող է հանդես գալ։ Բայց շատ կարևոր է, թե դրա տակ ինչ քայլեր ու գործողություններ դրված կլինեն»։